Ruçi: Ky sesion parlamentar do të vulosë hapjen e negociatave me BE-në

Në një bashkëbisedim ditën e sotme me gazetarët, kryetari i Kuvendit, Gramoz Ruçi paraqiti arritjet e sesionit të shkuar parlamentar.

Ruçi vlerësoi si arritjen më të madhe në sesionin e shkuar miratimin e reformës në drejtësi, ndërsa theksoi si një mangësi të rëndësishme mosmiratimin e Ligjit për Magjistraturën.

“Reforma në drejtësi është sukses i madh i sesionit të kaluar parlamentar. Siç e theksova dhe dje angazhimi jonë për reformën nuk ka sjellë atë produkt që prisnim. Kështu Këshilli për Legjislacionin nuk përmbushi detyrën për Gjykatën Kushtetuese dhe Kuvendi nuk miratoi dot kryeinspektorin e lartë të drejtësisë për shkak të mosfunksionimit të KLP. Një tjetër mangësi e atij sesioni ishte mosmiratimi i Magjistraturës. Roli i Kuvendi u forcua dukshëm”, tha Ruçi.

Ndërkohë, sa i përket sesionit të ri parlamentar, i cili nisi një ditë më parë, me seancën e parë e cila u zhvillua pa pjesëmarrjen e opozitës, Ruçi theksoi se në këtë sesion do të vuloset çelja e negociatave për anëtarësim në Bashkimin Evropian. /TCH/