Murati i bindur se duhet të ketë “korrigjim të kufijve”, tregon edhe se çfarë fiton Kosova

Kryetari i Lëvizjes për Bashkim, Valon Murati, përmes një postimi në Facebook ka thënë se ata që po thonë se me ridefinim të kufijve, humb Kosova, e kanë gabim.

Madje, siç thotë Murati, ata po shkaktojnë panik, po përpiqen të tmerrojnë njerëzit dhe po dezinformojnë qëllimshëm.

Në këtë drejtim, Murati ka thënë se përkundrazi, nuk ka nevojë as për panik, pasi që sipas tij, Kosova fiton shumë nga ky proces.

Më poshtë keni shkrimin e tij, ku ai tregon se çfarë fiton Kosova:

Po thonë me ridefinimin e kufijve, Kosova humb. Po shkaktojnë panik. Po përpiqen të tmerrojnë njerëzit. Po i dezinformojnë qëllimshëm.

Po çka humb Kosova me ridefinimin e kufijve:

– Humb të drejtën e vetos së serbëve për ndryshimin e Kushtetutës dhe ligjeve vitale, që e kanë bërë Kosovën shtet jofunksional (kujto bllokimin e ushtrisë);

– Humb mundësinë që të na instalohet asociacioni i komunave serbe në Kosovë;

– Humb mundësitë që vazhdimisht të destabilizohet Kosova nga pjesë që nuk është luajale me të.

– Humb mundësinë që në Kosovë të ketë në vazhdimësi tensione etnike, që mund të çojnë deri në konflikte të izoluara në të ardhmen.

E çka fiton Kosova:

– Fiton Kosovën Lindore

– Fiton funksionalitetin e shtetit

– Fiton sovranitetin e plotë.

– Fiton mundësinë që të fillojmë të merremi me problemet jetësore, ekonominë, sundimin e ligjit, luftimin e korrupsionit, arsim, shëndetësi, mirëqenien social etj.

– Fiton paqen e stabilitetin.

– Fiton mundësinë për të filluar për të vendosur raporte normale me Serbinë.

– Fiton mundësin për të vendosur për bashkimin me Shqipërinë, apo formën që mund të ketë ky bashkim.(sic) /Telegrafi/