Komentet dhe fotografitë që i postoni në rrjete sociale mund t’ju lë pa punë

Herën e ardhshme kur dëshironi të bëni një koment ofendues në Twitter apo Facebook, ose të publikoni një foto në gjendje të dehur, vetëm keni parasysh se punëdhënësit e ardhshëm janë duke shikuar – dhe kjo mund t’ju kushtojë me vend të punës.

Një në pesë punëdhënës kanë thënë se e kanë refuzuar një kandidat për punë pasi kanë parë se çfarë ka postuar në internet, transmeton Telegrafi.

Ndonëse shumica e njerëzve janë të vetëdijshëm për rëndësinë që kanë rrjetet sociale, numri i organizatave që refuzojnë kandidatë të shumtë sugjeron se ende ka njerëz që nuk mendojnë para se të postojnë.

Sipas të dhënave, aktiviteti më i shpeshtë dhe më i dëmshëm që ia bëni karrierës tuaj në rrjete sociale janë komentet ofenduese ose agresive.

Por edhe referencat për përdorim të drogës nuk janë shumë prapa kësaj.

Në vendin e tretë, si arsye se përse mund të mos ju punësojë dikush, është gramatika. Në fakt, gramatika dhe drejtshkrimi janë më të dëmshme për reputacionin e kandidatit sesa fotot në gjendje të dehur.

Vlen të ceket se kjo nuk vlen vetëm para se ta fitoni vendin e punës, pasi që një pjesë e madhe e punëdhënësve pranojnë se e kanë pushuar nga puna një punëtor pasi ai/ajo ka postuar diçka të pahijshme në rrjete sociale. /Telegrafi/