Sulmi në Muenster nuk ishte terrorist

Tragjedia e Munsterit, ku 3 persona u vranë nga një sulm me mikrobus, në fund rezultoi se nuk ka sfond terrorist, por autori i krimit, sipas gazetës Suddeutsche Zeitung, ishte një 48-vjeçar vendas me probleme psikike.

Bild nga ana tjetër sqaron se agresori që përdori automjetin për t’u vërsulur mbi turmën e njerëzve, nuk ka qenë person i njohur për policinë.

Ai vrau veten menjëherë pas ngjarjes, duke përdorur një armë zjarri. Policia gjermane ka kontrolluar apartamentin e 48 vjeçarit për të zbuluar nëse mbante lëndë shpërthyese e po kontakton edhe me ata që e njihnin.

Raportet në media tregojnë se 6 prej 20 të lënduarve nga incidenti, janë në gjendje të rëndë.

Tragjedia ndodhi në restorantin tradicional Kiepenkerln, mjaft i preferuar tek qytetarët e Muensterit dhe turistët, dhe në një ditë me mot të mirë si e shtuna, restoranti ishte kthyer në një pikë takimi për shumë veta.

Pjesa e vjetër e qytetit, e cila u kthye në skenën e fatkeqësisë, njihet për arkitekturën e shekullit të XIX. Kryebashkiaku i Muensterit, Markus Lewe tha në komentet për shtyp se i gjithë qyteti mban zi për këtë ngjarje të tmerrshme, duke shprehur ngushëllimet për familjet e viktimave si dhe shpresën për shërim të shpejtë të të plagosurve. /KP /Telegrafi/