Ministria e Financave shpjegon procedurat deri te plotësimi i kërkesave të SBASHK-ut

Lulzim Rafuna, këshilltar i ministrit të Financave, Bedri Hamza, ka thënë se Ministria e Financave është e obliguar të respektojë procedurat ligjore, para se të shkojë në Kuvendin e Kosovës Projektligji për Punëtorët e Arsimit të viteve të 90‘ta të shekullit të kaluar.

Sipas tij, këtë çështje Ministria e Financave e ka trajtuar në kuadër të kërkesave me prioritetin më të lartë.

Kjo, ka thënë Rafuna, është bërë me qëllim e vetëm që t’i jepet mbështetje realizimit të të gjitha të drejtave që dalin nga ky projektligj për të gjithë punëtorët e arsimit shqip të Kosovës për vitet e 90-ta.

Ai ka ftuar të gjithë mësimdhënësit të mos hyjnë në grevën e paralajmëruar për të hënën.

“Ne do të punojmë të realizojmë kërkesat e sindikalistëve. Zgjidhje do të ketë, por do të duhet kohë”, ka thënë Rafuna në një intervistë për RTK.

Edhe Ministria e Arsimit, Shkencës dhe Teknologjisë e ka kundërshtuar grevën gjithëditore, të planifikuar për 12 mars, në të gjitha institucionet e arsimit në Kosovë, duke thënë se e konsideron atë të paarsyeshme.