Pesë persona të arrestuar për prostitucion, lokalet për masazhe shfrytëzoheshin për veprimtari të kundërligjshme

Drejtoria për Hetimin e Trafikimit me Qenie Njerëzore, pas hetimeve paraprake, ka realizuar dy operacione dhe ka arrestuar pesë të dyshuar.

Operacioni i parë në fshatin Vitomiricë të Pejës është zhvilluar nën dyshimin e konsumimit të veprave penale “Mundësim ose Detyrim në Prostitucion” dhe “Ofrimi Lokaleve për Prostitucion”.

Në një lokal që shfrytëzohej për masazh, dyshohet se shfrytëzohej edhe për veprimtari të kundërligjshme.

Nga aty janë arrestuar katër të dyshuar: A.G 1991 mashkull; A.G 1984 mashkull; V.T 1992 femër, si dhe F.D 2001 femër.

Dy të dyshuarit e parë (meshkujt), me vendim të prokurorit kompetent, janë dërguar në mbajtje për 48 orë.

Nga vendi i ngjarjes janë marrë dëshmi relevante rreth kryerjes së kësaj veprimtarie të kundërligjshme.

Me vendim të zyrtarëve kompetent, lokali ku zhvillohej veprimtaria e kundërligjshme është mbyllur.

Në operacionin tjetër të zhvilluar në fshatin Hajvali të Prishtinës, në bashkëpunim edhe me inspektor të ATK-së  dhe zyrtarë kompetent komunal, në një lokal që shfrytëzohej për masazh është arrestuar i dyshuari F.Rr 1990 mashkull.

Për të njëjtin ekziston dyshimi i bazuar se ka trafikuar dy viktimat femra kosovare, shqiptare, me qellim të shfrytëzimit për punë të detyruar dhe shërbime seksuale.

Me urdhër të prokurorit i dyshuari dërgohet në mbajtje për 48 ore.

Dy viktimave u është ofruar strehim dhe trajtim  sipas procedurave standarde për viktimat e trafikimit.

Nga vendi i ngjarjes janë marrë dëshmi relevante rreth kryerjes së kësaj veprimtarie të kundërligjshme. /Telegrafi/