Dentistja shqiptare e akuzuar për mashtrim 900 mijë euro

Prokuroria e Durrësit bëri me dije ditën e sotme se kanë nisur hetimet për një 38-vjeçare nga Tirana, e cila është shpallur në kërkim, e akuzuar se ka përvetësuar 900 mijë euro nëpërmjet mashtrimit.

Mësohet se e akuzuara është dentistja e ‘ShendiDent’ me banim në Tiranë, Olesia Duka.

Prokuroria thotë se nga hetimet e kryera, dyshohet se 38-vjeçarja përmes gënjeshtrës dhe mashtrimit i ka marrë shuma të mëdha financiare biznesmenit I. H., që nga njohja mes tyre në nëntor 2016, dhe vazhdon të mos ja kthejë.

Po ashtu është zbuluar se Duka, e njohur si dentistja e Vip-ave ka mashtruar edhe persona të tjerë, duke iu vjedhur shuma të mëdha parash, por “goditjen” më të madhe e ka marrë I.H., i cili ka bërë dhe denoncimin ndaj saj.

Për rrjedhojë Gjykata ka vendosur sekuestro preventive për pesë pasuri të 38-vjeçares dhe familjarëve të tij me një vlerë mbi 300 mijë euro dhe më konkretisht bëhet fjalë për apartamente, shkruan gazetadita.

Rezulton se Duka mashtronte persona të ndryshëm, duke iu marrë shuma të mëdha parash, duke iu thënë se kishte 8 klinika dentare dhe se i duheshin paratë për të blerë aparatura.

Por pasi merrte paratë ajo nuk i kthente më. Ndaj saj gjykata ka vendosur masën e sigurisë “arrest me burg”, duke u shpallur në kërkim.

Deklarata e prokurorisë:

Prokuroria pranë Gjykatës së Shkallës së Parë Durrës në bashkëpunim me Sektorin e Krimit Ekonomik në Drejtorinë e Përgjithshme të Policisë mundësoi zbulimin e një vepre penale të një shtetasje për mashtrim me vlera të mëdha financiare, deri në 900 mijë euro.

Prokuroria pranë Gjykatës së Shkallës së Parë Durrës në 26 janar 2018 ka filluar procedimin penal nr. 143/2018, për veprën penale “Mashtrimi”, te parashikuar nga neni 143/3 i K. Penal në ngarkim të shtetases Olesia Duka banuese në Tiranë në dëm të shtetasit paditës I.H.

Nga materialet hetimore paraprake të mbledhura ekzistojnë dyshime të arsyeshme të mbështetura në prova se nga autori i veprës penale Olesia Duka (madhor) është kryer vepra penale e “Mashtrimit” parashikuar nga neni 143/3 i Kodit Penal, i cili me anë të veprimeve të gënjeshtrës dhe shpërdorimit të besimit vazhdon të mos kthejë shumën e parave të marra duke kryer në këtë mënyrë veprën penale ndaj të dëmtuarit I.H.që nga njohja mes tyre në nëntor 2016.

Autori i veprës penale vazhdon të kryejë veprime në mbulimin dhe dredhinë për mashtrim dhe vjedhjes se shumave të mëdha parash edhe tek disa persona të tjerë.

Për këto arsye nga ana e Gjykatës së Rrethit Gjyqësor Durrës, është caktuar masa e sigurimit arrest ne burg për shtetasen O.D. e datëlindjes 26.09.1980, me banim në Tiranë.

Nisur nga dëmi i madhe i shkaktuar të dëmtuarit nga vepra penale, nga ana e Gjykatës është vendosur sekuestroja preventive për pesë pasuri të autorit dhe familjarëve të tij me një vlerë mbi treqind mijë Euro.

Hetimet vazhdojnë për identifikimin e shumave të vjedhura dhe të fshehura nga ana e autorit të veprës penale.