Limaj: Java e ardhshme do t’i sjellë Kosovës lajme të mira, të cilat kanë munguar për vite

Njëri nga meritorët më të mëdhenj në zgjidhjen e “ngërçit” në rastin e demarkacionit, Fatmir Limaj ka thënë se marrëveshja e arritur sot duhet të shërbejë si shembull se vetëm përmes dialogut mund të arrijmë suksese dhe të tejkalojmë sfida.

Lideri i NISMA’s, nuk ia ka lënë asnjë meritë vetes për arritjen e marrëveshjes së demarkacionit. I ka falënderuar të gjithë për të pajtim, ndërsa ka paralajmëruar se javën e ardhshme do të ketë lajme të mira për qytetarët e Kosovës.

Në anën tjetër, edhe sot partitë tjera kanë tentuar t’ia lënë vetes meritat për marrëveshjen e re.

Limaj ishte marrë më së gjati për të gjetur një zgjidhje për demarkacionin. Kishte realizuar vizita edhe në Mal të Zi larg mediave. Kishte arritur t’i bindte liderët e Kosovës se duhet të arrijnë një pajtim për ta ratifikuar marrëveshjen e demarkacionit që ishte arritur më 2015.

“I falënderoj të gjitha forcat politike që përmes dialogut kemi ardhur deri të vendimi i përbashkët për të votuar demarkacionin. Lë të na shërbeje kjo si shembull se vetëm përmes dialogut, transparencës dhe respektit dhe duke pasur në qendër interesin e vendit ne se bashku mund t’i tejkalojmë me sukses edhe shumë sfida që na presin. Java e ardhshme do t’i sjellë Kosovës, shumë lajme  të mira të cilat kanë munguar për vite”, ka shkruar Limaj pasi është arritur marrëveshja.

“Vendi ka pasur nevojë për lajme të mira. Po ashtu dua t’i falënderoj edhe mediet dhe opinonisët cilat gjatë kësaj kohë kanë luajtur rol të madh të arrijmë në këtë moment”, ka shtuar ai. /Telegrafi/