Votimi i mocioni për shkarkimin e ministrit Gashi, pas pauzës (Video)

E plotësuar: Pas debatit tri orësh, mocioni i LDK-së për shkarkimin e zëvendëskryeministrit Dardan Gashi mbet të votohet pas pauzës.

Mos pjesëmarrja e pozitës në votim u bë pasi shefi i deputetëve të PDK-së, Memli Krasniqi kërkoi që votimi të bëhet pas pauzës.

Ky mocion do të dalë në votim pas pauzës. Seanca vazhdon në ora 15:00.

Haradinaj në interpelancë: Pavarësisht traditës, gjuajtja me armë nuk është veprim i hijshëm

E plotësuar: Kryeministri i vendit, Ramush Haradinaj duke folur për rastin e gjuajtjes me armë të ministrit Dardan Gashi tha të premten para deputetëve të Kuvendit të Kosovës Policia e Kosovës ka intervistuar për këtë çështje pesë persona.

Haradinaj tha se kjo lëndë tani është në Prokurorinë e Gjakovës.

Kryeministri tha se gjuajte me armë dhe ekspozimi i armëve nuk është veprim i hijshëm në shekullin XXI, por sipas tij, duhet thënë se janë disa tradita të gjuajtjes me armë.

Por, sipas tij, ky është një rast i tërheqjes së vërejtjes se të gjithë duhet korrigjuar, përfshirë edhe traditat.

E plotësuar: Glauk Konjufca, shef i Grupit parlamentar i lëvizjes Vetëvendosje tha se gjuajtja me armë nga ana e ministrit të Diasporës, Dardan Gashi është shkelje e ligjit dhe veprim jo i hijshëm i një zyrtari shtetëtor.

Ai tha se me meqenëse ministri Gashi ka gjuajtur me armë, duket se nuk i ka shikuar reklamat e KFOR-it.

“Zyrtarët e shtetit duhet të kenë kujdes me paraqitjen e tyre në publik”, tha Konjufca.

Shefi i Grupit parlamentar i VV-së tha se e kupton që në odën e burrave kur sheh që të tjerët po gjuajnë, të vjen të bëhesh trim edhe pa qenë hiç.

Sipas tij, problemi më i madh është kur dihet se ku ka ndodhur, në shtëpinë e zëvendëskryeministrit.

“Edhe më shqetësues bëhet kur merret vesh arsyeja pse janë mbledhë. Janë mbledh për të festuar që zv.kryeministri ka dalë i pafajshëm prej drejtësisë lidhur me aktakuzën për korrupsion”, tha Konjufca.

Sipas tij, derisa kryeministri Haradinaj e kishte arsyetuar veprimin e ministrit Dardan Gashi, ministri i Drejtësisë, Abelard Tahiri të paktën ka qenë i rreptë me deklaratat, duke thënë se shkelësit e ligjit duhet përgjigjur para drejtësisë.

Glauk Konjufca më tej tha se rreziku është edhe sa dinë Gashi të gjuajë me armë dhe për këtë ishte dashur të shtohet perimetri i rrezikshmërisë. /Telegrafi/

Zemaj kërkon që të shkarkohet Dardan Gashi, për gjuajtje me armë

E plotësuar: Deputeti i Lidhjes Demokratike të Kosovës (LDK), Armend Zemaj, ka treguar arsyet e kërkimit të interpelancës për kryeministrin Ramush Haradinaj, që kanë të bëjë me gjuajtjen me armë të zëvendëskryeministrit të Kosovës, Dardan Gashi, njëherësh ministër i Diasporës dhe Investimeve Strategjike.

Ai në foltoren e Kuvendit, ka theksuar se këto pamje e kanë dëmtuar edhe më tepër imazhin e kabinetit qeveritar, e cili sipas tij, është dëmtuar.

“Është e domosdoshme të mos lejohet degradimi i besimit dhe prishja e imazhit të lënduar nga skenat me karakter kriminal. Qytetarët dëshirojnë siguri për veten dhe familjet e tyre dhe nuk duan rrezikim të jetës nga kabineti i papërgjegjshëm qeveritar”, ka shtuar Zemaj.

Ai ka kërkuar në tekstin e mocionit që të shkarkohet zëvendëskryeministri Dardan Gashi nga pozita e tij dhe Qeveria të mbajë përgjegjësi për aktin e kryetar nga ky anëtar i kabinetit qeveritar. /Telegrafi/

Vazhdimi i seancës së Kuvendit, Haradinaj në interpelancë

E plotësuar: Ka nisur vazhdimi i seancës së Kuvendit të Kosovës, ku në rend dite është interpelanca e kryeministrit Ramush Haradinaj, sipas kërkesës së Grupit Parlamentar të Lidhjes Demokratike të Kosovës, për ta informuar Kuvendin në lidhje me gjuajtjet me armë nga Dardan Gashi, zëvendëskryeministër dhe ministër i Diasporës dhe Investimeve Strategjike.

Megjithëse të enjten ishte thënë se interpelanca do të jetë si pikë e fundit e rendit të ditës, sot deputetët vendosën që interpelanca të jetë pikë e parë e seancës së sotme.

Po ashtu, në seancë do të jetë në rend dite edhe votimi i Projektligjit për ndryshimin dhe plotësimin e Ligjit nr. 04/L-034 për Agjencinë Kosovare të Privatizimit, i ndryshuar dhe i plotësuar me Ligjin nr. 04/L-115 dhe Ligjin 05/L-080, shqyrtimi i parë i Projektligjit për Azil, shqyrtimi i dytë i Projektligjit për Standardizim, shqyrtimi i Raportit vjetor të Autoritetit Rregullator të Komunikimeve Elektronike dhe Postare për vitin 2016, shqyrtimi i Raportit vjetor të Agjencisë së Statistikave të Kosovës për vitin 2016, shqyrtimi i Strategjisë së Energjisë të Republikës së Kosovës 2017-2026, zgjedhja e një kandidati për anëtar joekzekutiv të Bordit të Bankës Qendrore të Republikës së Kosovës.

Po ashtu në rend dite është zgjedhja e pesë zëvendësve të Avokatit të Popullit, propozimi i grupeve parlamentare për zëvendësimin e anëtarëve në komisione parlamentare, propozimi për emërimin e tre anëtarëve në Komisonin për të Drejtat, Interesat e Komuniteteve dhe për Kthim, shqyrtimi i dytë të Projektligjit për Tatimin në Pronën e Paluajtshme. /Telegrafi/