Urimi i Haradinajt në “Ditën e Veteranit”: Të bashkohemi në fuqizimin e shtetit

Kryeministri i Kosovës, Ramush Haradinaj, i ka uruar veteranët e Luftës Çlirimtare për ditën e tyre, 30 dhjetorin.

“Kaluam së bashku ditë të paharruara, me vështirësi e flijime, të pikëlluar kur humbnim shokët, të lumtur kur korrnim fitore. Ato janë ditët e lavdisë, që i kujtojmë gjithmonë, e në atë frymë, po ndërtojmë edhe paqen”, thuhet në urimin e kryeministrit Haradinaj, transmeton Telegrafi.

“Sot, në cilësinë e Kryeministrit të Republikës së Kosovës, ju uroj Ditën e Veteranit, ditën tonë të përbashkët, ku përkujtojmë luftëtarët shqiptarë të të gjitha kohërave.  Kujtojmë shokët e rënë, lavdinë dhe fitoren e Ushtrisë Çlirimtare të Kosovës”.

Tani, kur jemi në 20 vjetorin e Rezistencës dhe dhjetë vjetorin e pavarësisë, duhet të jemi më të bashkuar se kurrë, si popull, që të kontribuojmë në qytetarinë aktive për ndërtimin dhe fuqizimin e shtetit tonë.
Qeveria e Republikës së Kosovës, do të jetë gjithherë në shërbimin tuaj. Urime 30 Dhjetori – Dita e Veteranit!”, thuhet në urimin e Haradinajt. /Telegrafi/