Nga një janari masa të reja lehtësuese për prodhuesit vendorë

Ministria e Financave ka njoftuar prodhuesit vendorë se janë finalizuar të gjitha procedurat ligjore për fillimin e implementimit të vendimeve për lirimin nga tatimi doganor dhe i akcizës për të gjitha subjektet e regjistruara si prodhues pranë Administratës Tatimore të Kosovës.

Prandaj, duke filluar nga data një janar 2018, të gjithë prodhuesit të cilët importojnë vet apo përmes kontraktorëve do të lirohen nga tatimi doganor, për lëndën e parë, gjysmë produktin, linjat e prodhimit, pajisjet e teknologjisë informative si dhe më pas do të lirohen nga tatimi i akcizës të gjitha produktet të cilat marrin pjesë si lëndë ndihmëse në procesin e prodhimit.

Ministri i Financave Bedri Hamza, është deklaruar shumë herë publikisht se prioritete i tij është zhvillimi i sektorit privat dhe se ky sektor do të jetë bartës i zhvillimit ekonomik.

Masat e ndërmarra pritet të ndikojnë në realizimin e të hyrave buxhetore siç është paraparë edhe në Buxhetin e vitit 2018.

Ministria e Financave gjithashtu njofton se asnjë ndryshim nuk do të ndodhë pa pëlqimin e Komunitetit të Biznesit.