Krerët politik në Maqedoni urojnë Festën e 28 Nëntorit

Kryetarët e partive politike në Maqedoni dhe funksionarë tjerë shtetëror kanë uruar qytetarët shqiptarë për Festën e Pavarësisë së Shqipërisë dhe Ditën e Flamurit.

Mesazhi kryesor i tyre është që të ruhet flamuri dhe shqiptarët të vazhdojnë të punojnë për ardhmëri të përbashkët evropiane, njofton Telegrafi Maqedoni.

Vesel Memedi:

Dita e flamurit dhe pavarësisë së shtetit shqiptarë është kurorëzimi i sakrificës së vazhdueshme të më shumë gjeneratave ndër shekuj me synim krijimin e shtetit shqiptarë në trojet etnike shqiptare. Pikërisht falë kësaj sakrifice të madhe dhe ndihmës së faktorit ndërkombëtar më 28 Nëntor para 105 viteve në Vlorë, Ismail Qemali me patriotët më të mëdhenj të kohës shpallën pavarësinë e Shqipërisë, pavarësi kjo që u legjitimua ndërkombëtarisht në më pak se gjysma e tokave shqiptare. Sot në këtë ditë të madhe për kombin duhet të konstatojmë me maturi të madhe se shqiptarët vazhdojnë të jenë nën një betejë të vazhdueshme për të rikonfirmuar veten si anëtar të respektuar në familjen e kombeve perëndimore. Sfidat e kombit shqiptarë sot janë po aq problematike dhe të rrezikshme si edhe një shekull më parë, kërkohet angazhimi i të gjitha kapacitetve kombëtare në udhëheqjen e kombit në të gjitha tokat shqiptare që përvjetoret e radhës të mos jenë vetëm kujtime historike por edhe shpresë dhe ardhmëri më e ndritur për kombin shqiptarë. Dita e Pavarësisë është dita e përjetësisë së një kombi, dita më e rëndësishme dhe më jetike për pjesëtarët e tij. Andaj, më lejoni që në emër të Rilindjes Demokratike Kombëtare dhe në emrin tim personal, të gjithë shqiptarëve t’ua uroj Ditën e Flamurit – Ditën e Pavarësisë.

Menduh Thaçi:

28 Nëntori ka qenë dhe mbetet simbol i krenarisë, qëndresës dhe vendosmërisë së popullit shqiptar, andaj duke përkujtuar me respekt të gjithë ata që me sakrificën dhe flijimin e tyre bartën te ne idenë për të qenë të lirë, uroj që të gjithë së bashku të vazhdojmë në këtë rrugëtim drejt realizimit të aspiratave tona të përbashkëta. Në emrin tim personal dhe në emër të Partisë Demokratike Shqiptare Ju uroj të gjithë shqiptarëve kudo që janë Ditën e Flamurit.

Talat Xhaferi:

Më lejoni që ta uroj 28 nëntorin, Ditën e Flamurit Shqiptar dhe në të njëjtën kohë Ditën e Pavarësisë të Republikës së Shqipërisë, fqinji jonë dhe shteti ynë mik. Kjo ditë kultivohet në memorien kolektive të të gjithë pjesëtarëve të popullit shqiptar, ndërsa shqiptarët janë pjesë e rëndësishme dhe integrale e Republikës së Maqedonisë. Sot, kur shënohet 105 vjetori prej kur diplomati i dalluar Ismail Qemali, bashkë me delegatë nga qytetet e ndryshme shqiptare e ngriti flamurin kombëtar në Vlorë, shqiptarët, kudo që të gjenden kremtojnë, për arsye se ky është segment i rëndësishëm në rilindjen kombëtare shqiptare.