Komiteti i Helsinkit: Parregullsi të shumta gjatë votimit të personave të verbër

Komiteti i Helsinkit kumtoi se gjatë procesit zgjedhor janë vërejtur parregullsi gjatë votimit të personave të verbër dhe personave me shikim të dëmtuar.

Nga Komiteti i Helsinkit informojnë se tek ata kanë arritur dy denoncime nga persona të kësaj kategorie, të cilët thanë se kanë pasur tentim të pasuksesshëm që ta realizojnë këtë të drejtë votuese në pajtim me mënyrën e re të votimit për personat e verbër dhe personat me shikim të dëmtuar, përcjell Telegrafi Maqedoni.

“Në pajtim me udhëzimin e ri për votim të personave të verbër dhe personave me shikim të dëmtuar, të miratuar më 28 shtator, personave të verbër dhe personave me shikim të dëmtuar u jepet mundësi të votojnë duke shfrytëzuar shabllon të Alfabetit Braj, ku janë shtypur të dhënat e fletëvotimit. Shablloni është përpiluar me qëllim që çdo person i verbër, respektivisht person me shikim të dëmtuar të mund të votojë në mënyrë të pavarur dhe të fshehtë. Personave të cilët i kanë paraqitur parregullsitë, nuk u është mundësuar ta realizojnë të drejtën e tyre zgjedhore në pajtim me mënyrën e re të votimit, pasi siç thanë, shabllonet e posaçme të Alfabetit Braj ende nuk kishin arritur në dy vendvotime të caktuara”, thuhet në kumtesë.

Denoncimet janë pranuar rreth orës 8 në mëngjes, potencojnë nga Komiteti i Helsinkit dhe shtojnë se në rastet konkrete votuesit nuk kanë qenë në mundësi ta realizojnë të drejtën e tyre zgjedhore në ditën e zgjedhjeve, që është shkelje e dispozitave të cituara ligjore.

Komiteti i Helsinkit informoi se rastin e kanë paraqitur te Ministria e Punës dhe Politikës Sociale, me qëllim që të bëhet mbikëqyrje për situatën faktike të rastit konkret nga ana e inspektorit të punës. /Telegrafi/