MPB e gatshme për ditën e votimit në Maqedoni

Policia është e përgatitur për ditën zgjedhore në Maqedoni. Me plan operativ do ta koordinojë punën në terren. Dhunë dhe incidente nuk guxon të ketë, thonë nga MPB-ja, dhe paralajmërojnë se përgjigja e policisë ndaj dhunuesve do të jetë e fuqishme.

Prania e policisë do të jetë e shtuar rreth vendvotimeve, ndërsa do të bëhen edhe zhvendosje të policëve me qëllim që të shmanget ndikimi ndaj tyre.

Policët do të jenë jashtë vendvotimeve, ndërsa do të ketë të drejtë të hyjë në rast se këtë e kërkon kryetari i komisionit zgjedhor.

Incidentet e fushatës zgjedhore vazhduan edhe mbrëmë përkundër faktit që në mesnatë filloi heshtja parazgjedhore. Sipas informatave nga buletini i MPB-së, një orë pas mesnate është demoluar shtabi një partie politike, ndërsa nga policia paralajmërojnë ndriçimin e këtyre rasteve.

Pjesë e punëve të veçanta për ditën e votimeve është edhe dhënia e letërnjoftimeve me procedurë urgjente, në rast se bëhet fjalë për letërnjoftim të dëmtuar, të humbur ose të vjedhur. Kërkesat pvr letërnjoftime të reja janë pranuar sot deri në orën 16:30 ndërsa nesër do të jepen dokumentet e përpunuara edhe atë nga ora 7 deri në ora 19./Telegrafi/