Familja shqiptare gjen 115 mijë euro, i dorëzon paratë në polici (Video)

Një familje turistësh shqiptar në Llogara, gjen një sasi prej 115 mijë euro dhe i dorëzon në Polici. Policia e Vlorës i falënderon për aktin qytetar.

Policia në përfundim të verifikimeve se kujt i përkiste kjo shumë monetare, ka sekuestruar shumën monetare prej 115 mijë euro dhe ka proceduar penalisht dy shtetas Ukrainas për mosdeklarim të ardhurash në Pikën e Kalimit Kufitar!

Seksioni i Hetimit të Krimit Ekonomik e Financiar në Drejtorinë Vendore të Policisë Vlorë, kanë nisur hetime intensive lidhur me një çantë personale, në brendësi të saj me vlera monetare, në një sasi prej 115 mijë Euro, të gjetur në zonën e Llogarasë.

Konkretisht: Çanta është gjetur prej një familjeje turistësh shqiptar në Llogara, në zonën ku hidhen parashutat, dhe e dorëzoi atë pranë strukturave policore.

Lidhur me këtë çantë në Sallën Opertative Vlorë, ka telefonuar një tjetër shtetas i cili njofton se në Llogara është harruar një çantë me vlera monetare prej dy shtetas Ukrainas.

Në përfundim të hetimeve nga Specialistët e Hetimit të Krimit Ekonomik pas verifikimit dhe identifikimin se kujt u përkiste kjo çantë si dhe prej nga e kanë burimin të ardhurat, të cilat nuk ishin deklaruar nga shtetasit posedues në Pikën e Kalimit Kufitar Rinas kanë nisur procedimin penal për shtetasit :

S.M., 62 vjeçe, dhe P.K., 57 vjeç, banues në Ukrainë. Policia ka sekuestruar në cilësinë e provës materiale shumën e vlerave monetare.

Materialet u referuan në Prokurori për veprën penale ”Mosdeklarimi në kufi i të hollave dhe i sendeve me vlerë”, parashikuar nga neni 179/a të Kodit Penal.

Policia falënderon familjen e cila njoftoi dhe dorëzoi pranë. Strukturave Policore çantën e gjetur me vlera monetare për aktin qytetar. /Telegrafi/

Sondazh: A do ti kthenit ju paratë e gjetura?