Fetai: Gjykimi për rastin ‘Sopot’ të fillojë sa më shpejtë

Për shkak të udhëtimit zyrtar të gjyqtarit, seanca për rastin ‘Sopot’ në të cilën akuzohen 10 persona për terrorizëm, është anuluar, përcjell Telegrafi Maqedoni.

Në gjykim kanë qenë të pranishëm pesë persona nga të akuzuarit, ndërsa kjo është seanca e parë pasi PSP e mori në dorë këtë rast.

Prokurorja Fatime Fetai ka deklaruar se pret që procesi gjyqësor për këtë rast që kur PSP e ka marrë në kompetencë, të fillojë sa më shpejtë të jetë e mundur, sepse, siç tha ajo, lënda disa vite është duke u refuzuar.

Fetai nuk ka dashur të zbulojë se me cilët argumente do të veprojë PSP në procedurë. Seanca e ardhshme është caktuar për 9 tetor.

Në një nga bisedat e përgjuara, që i publikoi LSDM para tre viteve te të ashtuquajturat ‘bomba’, zhvillohet një bisedë në mes ish-ministres së MPB-së Gordana Jankulloska dhe drejtorit të atëhershëm të policisë sekrete Sasho Mijallkov, gjegjësisht për rastin ‘Sopot’.

Në rastin ‘Sopot’ akuzohen dhjetë banorë të fshatit Sopot, se në vitin 2003, kanë vendosur granatë, ku vdiqën dy ushtarë të NATO-s nga kontingjenti polak dhe një civil nga Maqedonia./Telegrafi/