Lekaj: Nuk kemi ndryshuar qëndrim për demarkacionin (Video)

Vazhdojmë të jemi kundër këtij versioni të demarkimit të kufirit në mes Kosovës dhe Malit të Zi. Kështu ka theksuar nënkryetari i Aleancës për Ardhmërinë e Kosovës (AAK), Pal Lekaj.

Ai ka thënë për Telegrafin, se ata do t’i qëndrojnë konsistent deklaratave që i ka bërë partia e tij në lidhje me vijën kufitare me fqinjin perëndimor.

Sipas tij, do të kërkohet që ky proces të rishikohet që nga fillimi, duke shtuar se Komisioni që ka qenë i angazhuar në këtë çështje, ka gabuar.

“Ne jemi të interesuar që të mos humbin territor, t’i ruajmë raportet e mira fqinjësore me Malin e Zi, dhe angazhohemi që i tërë procesi të zgjidhet në mënyrë paqësorë. Besoj se do të gjejmë gjuhë të përbashkët me partnerët e koalicionit dhe miqtë ndërkombëtar”, ka shtuar Lekaj.

Ndryshe, dje pas gati tre muajve, është arritur marrëveshja në mes koalicionit PDK – AAK dhe Nisma (PAN) dhe Aleancës për Kosovë të Re (AKR), më ç’rast pritet të bëhen numrat e mjaftueshëm për ta bërë shumicën në Parlamentin e vendit. /Telegrafi/