Buxheti i Kosovës realizon rritje të të hyrave nga Dogana dhe ATK

Dy institucionet kryesore për mbledhjen e të hyrave buxhetore, Dogana dhe Administrata Tatimore e Kosovës, në periudhën janar-korrik të këtij vitit, kanë shënuar rritje të ndjeshme në buxhetin e Kosovës.

Vetëm Dogana e Kosovës gjatë kësaj periudhe ka arritur të shënojë 700 milionë të hyra buxhetore, që në krahasim me periudhën e njëjtë të vitit të kaluar ka shënuar rritje për 10 për qind. Këtë e konfirmon për Radio Kosovën, zëdhënësi i Doganës, Adriatik Stavileci.

Edhe Administrata Tatimore e Kosovës këtë periudhë e konsideron si një trend pozitiv për mbledhjen e të hyrave. Vetëm gjatë kësaj kohe, sipas zëdhënëses Valentina Bytyqi- Sefa, ATK ka inkasuar 238.6 milionë euro, apo 8.3 për qind më shumë se e njëjta periudhë e vitit paraprak.

Sipas zyrtarëve, aksionet e shpeshta në luftimin e ekonomisë joformale, bashkëpunimi me qytetarë, lehtësimi i procedurave të importit-eksportit, përdorimi i sistemeve të avancuara, eliminimi i procedurat burokratike dhe diskrecionit kanë ndikuar pozitivisht në rritjen e të hyrave në arkën e shtetit.