Promovohet monografia “Gjeneralët ushtarak në Maqedoni (1941-2017)”

Në kuadër të aktiviteteve për shënimin e 25-vjetorit të Armatës të Republikës së Maqedonisë (ARM) dje në Shtëpinë e Armatës në Shkup u promovua monografia “Gjeneralët ushtarak në Maqedoni (1941-2017)” nga gjeneralët në pension Mirosllav Stojanovski dhe Boris Stojanoski, raporton Anadolu Agency.

Sipas autorit të monografisë, gjeneralit në pension Mirosllav Stojanovski, përfundon një proces, i cili sipas tij ka filluar me idenë për të dhënë një kontribut në shënimin e 25-vjetorit të ushtrisë dhe se ky proces është pikërisht promovimi i monografisë.

“Monografia paraqet një vepër të veçantë që përmban shumë të dhëna biografike dhe të tjera për 90 gjeneralë sa ka në historinë e re të Maqedonisë, respektivisht nga 1941 deri në 2017. Ajo që duhet të theksohet është se qëllimi ynë kryesor është që në një vend të mblidhen të dhënat për një grup të caktuar shoqëror, ku bëhet fjalë për gjeneralët të cilët në jetën e tyre nuk kanë kontribuar vetëm në zhvillimin profesional, por edhe për jetën shoqërore në shtetet ku kanë jetuar”, tha Stojanovski.

Ai theksoi se në këtë mënyrë japin kontribut në afirmimin e Shoqatës që meriton më shumë vëmendje dhe angazhim në shoqëri, apo angazhim nga ana e institucioneve kompetente me përgjegjësi në sektorët e mbrojtjes dhe të sigurisë.

Monografia është botuar nga shoqata “Klubi i gjeneralëve të Republikës së Maqedonisë”, mbështetur nga Ministria e Mbrojtjes dhe Armata e Republikës së Maqedonisë, si një botim i rëndësishëm për historinë ushtarake të Maqedonisë.

Në promovim e pranishme ishte dhe ministrja e Mbrojtjes, Radmila Shekerinska, shefi i Shtabit të Përgjithshëm të ARM-së gjeneral nën-kolonel Metodija Veliçkovski, zëvendës ministri i Mbrojtjes, Bekim Maksuti, ish ministrat dhe ish-shefat e SHP të ARM-së, përfaqësues të Asociacionit të atasheve ushtarak, një numër i udhëheqësve të lartë ushtarak dhe përfaqësues të Ministrisë së Brendshme dhe ARM-së, si dhe anëtarë të klubit të gjeneralëve.