Misteri i katit të pestë të hotelit në Korenë e Veriut, ku u ndalohet hyrja turistëve – kurse në ashensor nuk ekziston ky numër (Foto/Video)

Ka filluar të rritet numri i atyre që të paktën një herë në jetë dëshirojnë ta vizitojnë Korenë e Veriut.

Ky vend i izoluar për shumëkënd është misterioz, kurse në të mund të futen shumë pak njerëz, transmeton Telegrafi.

Përveç parave, natyrisht se nevojitet të keni guxim, e në veçanti pas asaj çfarë i ka ndodhur studentit amerikan Otto Vormbir, i cili nga kati i pestë i hotelit në të cilin që i ndalohet hyrja çdo të huaji, arriti të vjedh një poster propagandues.

Ai udhëtimin e tij për në Korenë e Veriut e kishte aranzhuar përmes agjencisë turistike Young Pioneers Tours, e cila tash e 10 vite organizon udhëtimet për në Korenë e Veriut.

Otto për shkak të vjedhjes është dënuar me 15 vite punë të rënda. Por, në fillim të muajit të kaluar u kthye në shtëpi në gjendje kome, kurse një javë më pas ndërroi jetë.

Këtë agjenci edhe të tjerët e kanë vizituar për faktin se ka çmime më të lira për udhëtimin në vendin më të izoluar në botë, por shumë konsiderojnë që menaxhmenti i saj nuk i kanë kushtuar edhe aq shumë rëndësi sigurisë së turistëve, dhe se qëllimisht i kanë ekspozuar në vende të rrezikshme.

Të gjithë turistët që udhëtojnë më këtë agjenci në Korenë e Veriut, akomodohen në hotelin ndërkombëtar Jangankdo, që është kryesisht i dedikuar për turistët ndërkombëtar.

Por, lidhur me këtë hotel qarkullojnë histori të ndryshme se ekziston “kati i pestë i “ndaluar”, ku turistëve u ndalohet qëndrimi, pasi është i dedikuar ekskluzivisht për punëtorët.

Brenda ashensorit nuk gjendet butoni me numër pesë që do të mund të dërgonte dikë në katin e pestë. Por, që ky kat nuk është mit dhe që vërtetë ekziston, pas tragjedisë së studentit amerikan, edhe shumë turistë tjerë kanë vendosur ta hulumtojnë.

Mjeku Kalvin San, themelues i agjencisë Monsun Diaries, kishte qëndruar në Korenë e Veriut gjatë vitit 2011. Së bashku me një grup të vogël turistësh ai kishte udhëtuar me aeroplan për në kryeqytetin e këtij vendi, ku kishte qëndruar në hotelin e shumëpërfolur, transmeton Telegrafi.

Brenda tij kishte boulling, bare të ndryshme dhe dhoma të veçanta ku luhet me letra. Por, ajo çfarë u interesonte në fakt ishte kati i pestë.

Ky kat ishte më i ulët sesa katet tjera dhe nëpër mure kishte posterë që lartësonin popullin e Koresë së Veriut. Në një poster shkruante se si do t’i hakmerren Shteteve të Bashkuara, dhe ishte e vizatuar një bombë në të cilën figuronte një mbishkrim – SHBA.

Kalvin San ka filmuar grupin e turistëve duke qëndruar në katin e “ndaluar”, dhe ka pranuar se si të gjithë ishin nervoz, pasi vazhdimisht thoshin se nuk do të duhej të ishin këtu.

Pasi që ka pasur rastin ta vizitoj këtë vend, Kalvin nuk beson që Otto kishte vjedhur posterin propagandistik nga ai kat, për çka edhe akuzohej nga autoritetet e Koresë së Veriut. Ai gjithashtu thotë se pamjet që janë filmuar nga kamerat e sigurisë ku shfaqet Otto, nuk i përkasin katit të ndaluar.

Përveç rrëfimit të tij, ekziston një video e vitit 2015 ku një grup i turistëve arrijnë të futen në katin e pestë, por një punëtore i kishte lutur që të zbresin poshtë.

Gjithashtu në internet është shfaqur edhe një video, ku shihen një grup tjetër turistësh duke shëtitur në katin e ndaluar të hotelit. Ata kishin arritur me ashensor duke prekur vazhdimisht butonat e katit të katërt dhe të gjashtë. /Telegrafi/