Stafi i QKUK-së trajnohet nga profesionistë nga SHBA-ja

Tridhjetë profesionistë mjekësorë të fushave të ndryshme nga Shtetet e Bashkuara të Amerikës po vizitojnë Kosovën, me organizim dhe negocim të organizatës Kosova Hope (një organizatë jofitimprurëse).

Ekipi mjekësor gjatë ditës së sotme  ka vizituar Qendrën Klinike Universitare të Kosovës,  ku drejtori i Curr Gjocaj, dhe drejtori i Organizatës Kosova Hope, Berat Gegaj, kanë nënshkruar një memorandum të bashkëpunimit i cili parasheh vizita dhe trajnime të stafit shëndetësorë nga Kosova në  Dekalb Medical Center në SHBA.

Marrëveshja  parasheh që të dyja palët  të vazhdojnë shkëmbimin e kuadrove për edukimin mjekësor të mjekëve të  licencuar të Kosovës dhe profesionistëve tjerë mjekësor.

Gjocaj iu shpjegoi profesionistëve shëndetësorë nga SHBA, punën  që bëhet në SHSKUK.

Ai tha se vetëm në QKUK, ka 37 klinika dhe shërbime të ndryshme,  ndërkohë që në organogram janë edhe spitalet e përgjithshme.

Në emër të profesionistëve nga SHBA, Michael S. Sorrells nga Grace Fellowship Church tha se ndjehet i lumtur që është në  mesin e stafit shëndetësorë në Kosovë, duke shpjeguar se ky është udhëtimi i tij i parë në Kosovë.

“Ndjehemi mirë që do të kemi mundësi tu shërbejmë  pacientëve në spitalet tuaja me disa nga profesionistët më të mirë të institucioneve tona, qëllimi i ardhjes sonë  është lidhja e marrëveshjes  zyrtare dhe  shërbimi për pacientët”,  përfundoi  Sorrells.

Berat Gegaj, drejtor i Organizatës Kosova Hope, theksoi “Në vitin 2008, ne kemi filluar projektin e këmbimit të nxënësve kosovarë për në SHBA, falë ndihmës dhe bashkëpunimit për vite me radhë përmes Kosova HOPE dhe Grace Fellowship Church në Atlanta SHBA”. /KP/