Arrestohet Bekim Syla, i dyshuar për vrasjen e Ibush Kllokoqit

Policia e Kosovës ka arrestuar Bekim Sylën, i cili po kërkohej për vrasjen e Ibush Kllokoqit.Kështu kanë thënë burime brenda Policisë së Kosovës.

“Arrestimi ka ndodhur sot në orët e hershme të mëngjesit ne Kishna Rekë të Drenasit”, kanë thënë burimet nga Policia.

Lajmin për arrestimin e Bekim Sylës e ka konfirmuar për Gazetën Blic edhe zëdhënësi i Policisë së Kosovës, Baki Kelani.

“Mund të konfirmojmë se, sot në orët e hershme të mëngjesit Policia e Kosovës bazuar në Aktvendim të lëshuar nga Gjykata e Qarkut në Prishtinë, ka arrestuar personin e dyshuar B. S. i lindur në vitin 1976. Personi i dyshuar tanimë i arrestuar është dërguar në mbajtje”, tha Kelani.

Bekim Syla ishte në arrati, kurse është i dënuar me 12 vjet burgim në rastin Bllaca.

Bekim Syla ishte pjesë e Rastit “Bllaca II”, që ishte vazhdimësi e “Bllaca I”, në të cilin, Fahredin Gashi qe dënuar me 18 vjet burg për vrasjen e Salih Gashit, vrasja e të cilit u klasifikua si krim i luftës .

“Bllaca II” filloi në shtator të vitit 2011 për të përfunduar në dhjetor të vitit 2012. U mbajtën mbi 40 seanca, nën akuzë ishin vënë 6 persona: Shpresim Uka, Shaban e Bekim Syla, Driton Hajdari Sadik Abazi, si dhe biznesmeni i dënuari nga “Blllaca I”, Faherdin Gashi, i njohur edhe si “Faruku”.

Ditën kur u shpall vendimi, ai ishte arratisur, për faktin se ai dhe disa të akuzuar të tjerë nuk ishin përcjell me polici për në gjykatë./GazetaBlic./