Kuvendi i Shqipërisë, sot votim për 7 ligjet e paketës së drejtësisë

Seanca plenare e radhës e Kuvendit të Shqipërisë ka sot në rend dite diskutimin e shtatë nga 27 projektligjet e paketës që rregullojnë funksionimin e institucioneve të sistemit të drejtësisë, pas miratimit të reformës kushtetuese.

Ndër projektligjet, për nga rëndësia, veçohen ndërhyrjet në kodet e procedurave, sidomos ato në kodin e procedurës penale dhe civile, por dhe ndryshimet në ligjin “Për mbrojtjen e dëshmitarëve dhe bashkëpunëtorëve të drejtësisë”, projektligji “Për organizimin dhe funksionimin e gjykatave administrative”, ai “Për organizimin dhe funksionimin e Ministrisë së Drejtësisë”, etj.

Miratimi i këtyre akteve kërkon shumicë të cilësuar prej 84 votash, ndaj dhe pritet një pjesëmarrje sa më e plotë e deputetëve të maxhorancës në seancë, ndërkohë që opozita vijon të bojkotojë punimet e parlamentit.

Protesta e Partisë Demokratike ka hyrë sot në ditën e 41-të dhe zyrtarë të saj nuk japin shenja tërheqje nga kërkesa e tyre për një qeveri teknike që do të garantoje zgjedhje të lira e të ndershme. /Telegrafi/