“Bisha” e çeliktë e Donald Trumpit (Foto/Video)

I njohur si “Cadillac One” apo “Bisha”, është vetura presidenciale me të cilën udhëton presidenti amerikan Donald Trump.

Vetura zyrtare e presidentit amerikan aktualisht është duke iu nënshtruar testeve finale, para se të parkohet pranë Shtëpisë së Bardhë, transmeton Telegrafi.

Kjo limuzinë është më e gjatë për dy metra se dy vetura standarde transportuese, dhe do të vazhdojë të jetë e lyer me ngjyrë të bardhë dhe të zezë, por gjatë testimeve ajo është kamufluar për të mos iu zbuluar dizajni.

General Motors që është marrë me prodhimin e kësaj veture, kishte planifikuar ta nxjerr në rrugë gjatë inaugurimit të Donald Trumpit në janar, por është shtyrë për në fund të muajit mars.

Limuzina që kap vlerën e 1.4 milion eurove është pjesë e flotës se 12 veturave që në total kanë kushtuar 17.5 milionë euro, dhe nuk ka dyshim që është vetura më luksoze në botë.

“Bisha” peshon tetë ton dhe ka dyer të çelikta prej 20 centimetrave që janë të rënda sikurse ato të aeroplanit Boeing 757, dhe janë të projektuara t’i rezistojnë sulmeve kimike dhe biologjike.

Xhami i përparmë mund t’i rezistoj goditjeve të plumbave, kurse karroceria është e prodhuar si tek vetura ushtarake me një trashësi prej 5 centimetra, transmeton Telegrafi.

Pjesa e poshtme është e përforcuar dhe mund t’i bëjë ballë shpërthimit të ndonjë bombe të vënë në rrugë, derisa rezervuari është i izoluar aq mirë sa që në asnjë mënyrë nuk mund të shpërthehet.

Xhami anësor i shoferit mund të hapet vetëm në rast të pagesave të taksave rrugore, kurse në bagazh është gjaku i presidentit në rast se nevojitet ndonjë transfuzion urgjent.

Brenda tij ka edhe pushkë në rast të ndonjë sulmi, kurse në bagazh gjendet edhe sistemi i instaluar për oksigjen në rast të ndonjë sulmi kimik.

Por një sasi e konsiderueshme e armëve janë të fshehura në pjesën e përparme të maskës së veturës, që mund të përdoren për t’i qëlluar sulmuesit. Gjithashtu, “Bisha” ka të instaluara kamerë për lëvizje gjatë natës. /Telegrafi/