Hoxha: Funksionimi efektiv i gjykatave themelore, kyç për sundimin e ligjit

Ministrja e Drejtësisë, Dhurata Hoxha, ka vizituar sot, Gjykatën Themelore në Pejë ku u prit nga kryetari i saj, Kreshnik Radoniqi me bashkëpunëtorë.

Pasi foli për arsyet e vizitës dhe gjendjes në sistemin e drejtësisë, Ministrja Hoxha diskutoi për reformën dhe prioritetet e Ministrisë së Drejtësisë.

“Një nga ndryshimet pozitive që presim të ndodhin pas rishikimit funksional në sektorin e sundimit të ligjit, është hartimi i strategjisë së sektorit të sundimit të ligjit, strategji e cila do të jetë baza e reformave të vazhdueshme që do të ndërmerren në sektorin e sundimit të ligjit, duke përfshirë edhe gjyqësorin. Funksionimi efektiv i gjykatave themelore është kyç për sundimin e ligjit”, theksoi ministrja Hoxha.

Po ashtu, ministrja vuri në dukje rëndësinë e pjesëmarrjes gjithëpërfshirës në rishikimin të legjislacionit.

“Pjesëmarrja juaj aktive duke kontribuar jo vetëm me punë në grupe punuese por edhe duke i komentuar me shkrim amendamentet e caktuara që ju i hasni në praktikë, do të jenë të mirëpritura dhe do të rishikohen nga grupi punues gjatë rishikimit të legjislacionit, ngase ligjet e aprovuara duhet të jenë edhe të aplikueshme”, theksoi Hoxha.

Kryetari i Gjykatës themelore, Kreshnik Radoniqi mirëpriti vizitën e Ministres Hoxha duke theksuar se vizitat e tilla ndikojnë gjithanshëm në punën e tyre, sepse është dëshmi se gjyqësori ka mbështetjen e plotë nga institucionet qendrore. “Përkushtimi ynë për ngritjen e cilësisë së gjyqësorit është i vazhdueshëm. Konsideroj se perceptimi i punës së gjyqësorit nuk është në pajtim me punën që bëhet, ne bëjmë punë të çmueshme dhe kontribuojmë çdo ditë për fuqizimin e sundimit të ligjit”, theksoi Radoniqi.

Në diskutim u mirëprit dhe vlerësua lartë vizita që i kontribuon jo vetëm komunikimit të drejtpërdrejtë në funksion të sundimit të ligjit, por edhe ngritjes së transparencës, ngase Gjykatat themelore janë qenësore edhe në ngritjen e perceptimit pozitiv të gjyqësorit./Telegrafi/