Nga sharjet ndaj gazetarëve, tek rrobdëshambri – kështu është një ditë e Donald Trump (Foto)

Dita e Donald Trumpit nis herët, rreth orës 06-06.30 me leximin e gazetave. “Nju Jork Tajms” dhe “Nju Jork Post” nuk mungojnë asnjëherë.

Politikë dhe kronikë.

Zakonisht, lajmet dhe komentet e irritojnë presidentin. Rezultati shfaqet menjëherë në Twitter, nga mesi i paradites: 09.30-10.00 është orari i sulmeve më të forta të Trumpit.

Më pas, presidenti merr raportet e shërbimeve të fshehta si dhe informacionet për dosjet më të rëndësishme.

Faqja “Huffington Post” zbulon se Trumpi kërkon që dokumentat të mos jenë të gjatë. Maksimumi një faqe. Dhe në secilën faqe, duhet të mos ketë më shumë se 9 pika, shumë skematike.

Trump këshillohet vazhdimisht me këshilltarët e Shtëpisë së Bardhë. Por sipas “Huffington Post”, ndonjëherë nuk i merr parasysh.

Këto kohë i ka kërkuar Majkëll Flinit, gjeneral në pension dhe këshilltar për sigurinë kombëtare, nëse për ekonominë është më mirë të ketë një dollar të fortë, apo të dobët. Flini i është përgjigjur se nuk e di dhe se duhet të pyesë një ekspert të tregjeve financiare.

Presidenti ka një stil shumë joformal në telefonatat me udhëheqësit e huaj.

Ka shkaktuar sensacion telefonata e 2 shkurtit me kryeministrin australian, Malkolm Tërnbull.

Sipas asaj që raporton “Uashington Post”, Trumpi pasi i ka thënë se SHBA nuk do të presë 1250 refugjatët myslimanë, ia ka mbyllur telefonin.

Donald Trump nuk humbet rast për të goditur publikisht median. Gazetarët janë “qeniet më të pandershme që jetojnë mbi Tokë”.

Por herë pas here presidenti ndryshon edhe ndaj kësaj kategorie. Të dielën në 5 shkurt, Trumpi shkoi të përshëndetet me gazetarët që e kishin ndjekur në rezidencën Mar-a-Lago në Florida.

Në fundjavë, presidenti ndodhet pothuajse gjithmonë në vendpushimin e tij të preferuar: vila e madhe dhe luksoze në detin e Floridës.

Aty zhvillon edhe takime politike ndërkombëtare. Në fundjavë do të presë kryeministrin japonez, Shinzo Abe. Do të luajnë edhe golf. Udhëheqësi japonez është i apasionuar, ashtu si Trumpi.

Sipas “Nju Jork Tajms”, pas orës 18.00 Trump vesh rrobdëshambrin dhe vazhdon të punojë në Shtëpinë e Bardhë.

Megjithatë, stafi i presidentit këtë herë ka përgënjeshtruar me vendosmëri, duke thënë se në gardërobën e Trumpit nuk ka fare rrobdëshambër. /bota.al/