Steve Kerr: Curry më i popullarizuar se Jordani

Trajneri i Golden State Warriors, Steve Kerr, thotë se ajo që e bën të mahnitet me Stephen Curryn është popullariteti i tij tek fëmijët, që është popullaritet sipas tij më i madh se sa që Michael Jordan ka pasur tek fëmijët në kohën e tij te Chicago.

“Numri i shikuesve është i njëjtë, por diferenca e madhe është në atë se fëmijët gravitojnë kah Stephi. Ju shihni aq shumë fëmijë të vogël me fanella të Stephit që po e lusin për autografe”, theksoi Kerr.

Jordan është pa dyshim lojtari më i popullarizuar ndonjëherë në NBA, por Kerr e bazon teorinë e tij për fëmijët e të sotmes, të cilët thotë se e duan Curryn për shkak të trupit të tij të një niveli modest. Stephen Curry është i gjatë 190 centimetra dhe kjo sipas trajnerit të Golden State i bën fëmijët ta duan lojtarin e tij kryesor.

Në anën tjetër bashkëlojtari i tij, Kevin Durant, thotë se rrjetet sociale kanë ndikuar në këtë popullaritet.

“Unë shoh tash fëmijë 3-4 vjeçare më iPad në dorë, dhe ata shohin më shumë video të tij në rrjetet sociale dhe e ndjekin atë në po këto rrjete”, theksoi Durant.

Sigurisht se Jordan në epokën e tij nuk ksihte Twitter, Instagram dhe Facebook.

Por, ende brendi i tij i veshjeve sportive e sidomos i këpucëve sportive është prej më të popullarizuarve 14 vjet pas pensionimit të tij.

Durant thotë se nuk ka dilema se sa më i popullarizuar do të ishte Jordan nëse do të ishte lojtar në këtë epokë të teknologjisë.

“Michael Jordan nuk u rrit në epokë të rrjeteve sociale dhe ai edhe atë kohë ishte shumë i madh. Paramendoni nëse ai do të luante dhe do të rritej tash si Michael Jordan, superylli i parë global i NBA. A mund të paramendoni cili do të ishte popullariteti i tij?”, shtoi Durant.

Durant precizoi se gjatësia e Curryt ka ndikuar në popullaritetin e tij, pasi beson se gjatësia e tij më e ulët se standardet e NBA kanë bërë të gjithë të besojnë se mund të luajnë basketboll, pasi vet Curry tash është ndër top pesë lojtarët më të mirë në botë. /Telegrafi/