Deklarata të ndryshme rreth vrasjes së ambasadorit rus, Erdogan ndalon çdo lajm rreth ngjarjes!

Orientalisti i njohur dhe kryetari i Institutit Rus për Lindjen e Mesme, Jevgenij Satanovski, i intervistuar dje në programin “Dy deri në pesë” të radios “Vesti” në Rusi ka dhënë një varg deklaratash interesante lidhur me vrasjen e ambasadorit rus, Andrei Karlov, në Ankara.

I pyetur për mendimet dhe analizën e tij lidhur me këtë sulm ndaj Rusisë, z. Satanovski është shprehur se me ç’po shohim, atentatori, Mevlut Mert Alltuntash po del se ka qenë pjesë e Partisë për Drejtësi dhe Zhvillim në Turqi, e cila drejton vendin që prej vitit 2002.

“Deklaratat e Turqisë, sidomos ato të kryetarit të bashkisë së Ankarasë, Melih Gokçek, nuk janë veçse përralla për t’ua treguar gjysheve në mbrëmje, sepse fëmijët nuk i besojnë,” – është shprehur ai, duke ironizuar qëndrimin e mbajtur nga shumë zyrtarë të lartë turq.

A do të ndikojë ky akt në marrëdhëniet e brishta dhe të saporregulluara disi mes Turqisë dhe Rusisë, specialisti rus për çështjet e Lidhjes së Mesme i është shprehur se për të ky rezulton të jetë një akt i kryer jo nga ana e turqve, por nëse del e kundërta atëherë “po, marrëdhëniet ndikohen, madje shumë rëndë,” – ka thënë ai.

Një tjetër specialist, turkologu dhe njëherazi drejtori i Qendrës Marrëdhënie Ndërkombëtare dhe Diplomacisë Publike, Vladimir Avatkovi, i intervistuar nga gazeta “Euro Asia Daily”, është shprehur se “të thuash se Alltuntashi ishte pjesë e lëvizjes “Gylen” është e palogjikshme.

Së pari, nëse do të dihej kaq mirë që ka qenë pjesë e lëvizjes, ky njeri do të ishte larguar menjëherë, pa as më të voglën mëdyshme, nga detyra pas tentativës për grusht shteti në 15 korrik”.

Ndërkohë, kryetari i një prej partive kryesore opozitare në Rusi, siç është Partia Bolshevike Kombëtare, Edvard Limonovi, është shprehur se ky nuk është fare “provokim”, siç e ka cilësuar presidenti ynë.

“Ne e dimë shumë mirë që Halepi ka qenë një nga qytetet më të veçanta osmane dhe Turqia e ka dashur gjithnjë atë qytet. Nuk është sekret që në 16 dhjetor në Halep u kapën plot 61 oficerë të lartë të NATO-s, mes të cilëve kishte edhe turq. Kjo është një hakmarrje; atentatori bërtiti për Halepin, ngase e dinte që do të vdiste për disa minuta,” – ka qenë qëndrimi i tij, i cili është ashpërsuar ndjeshëm në fund të intervistës me gazetarin e njohur rus, Ivan Zuev.

“Erdogani është një aleat gënjeshtar. Në thelb, nga ana e tyre marrëdhëniet nuk janë përmirësuar asnjëherë. Gjithçka është dukur si përmirësim vetëm sajë naivitetit tonë. Rusia duhet të shkëpusë menjëherë marrëdhëniet dhe të largojë ambasadorin turk nga Rusia”.

Ndërkohë që në shtypin rus ka nisur një diskutim i gjerë dhe i nxehtë lidhur me këtë ngjarje, edhe në Turqi, ato pak gazeta të mbetura që bartin frymë opozitare nuk kanë ndenjur të heshtura, si duke i dhënë jehonë debatit në Rusi, si duke publikuar të dhëna interesante për lidhjet e dyshimta që atentatori ka pasur me grupime ekstremiste dhe partinë që qeveris në vend.

Si babai, si shumë shokë të afërt të atentatorit tregojnë se ai kishte nisur të shoqërohej dhe të jetonte me persona të përfshirë në grupime që sot cilësohen si celula parapërgatitore për El-Nusran.

Fare papritur, dje qeveria turke ka marrë vendim të menjëhershëm për ndalimin e transmetimit të lajmeve lidhur me vrasjen e ambasadorit rus javën e shkuar, duke qenë se kjo mund të ndikojë negativisht hetimet që janë në proces e sipër. /panorama/