SHBA, një vit burg për britanikun që tentoi të vriste Trumpin

Britaniku i cili u përpoq të rrëmbente një armë me synimin për të vrarë ish-kandidatin republikan për president, tashmë president i zgjedhur Donald Trump, është dënuar me një vit e një ditë burgim.

Michael Sandford, 20 vjeç, pranoi fajësinë në shtator, si një i huaj i paligjshëm nën zotërimin e një arme zjarri dhe me synimin për t’i bërë keq një zyrtari. Ai u akuzua për rrëmbimin e armës së një polici gjatë një mitingu në Las Vegas, për të qëlluar kandidatin e atëhershëm republikan.

Nëna e tij, gjithsesi, thotë se “ai është penduar për veprimin e tij”. Sandford, i lindur në Dorking të Surrey, rrezikonte deri në 10 vite burgim me akuzën e një komploti vrasjeje.

Gjykata vendosi mundësinë që ai të mund të lirohet pas vetëm 4 muajsh, moment pas të cilit ai duhet deportuar menjëherë për në Britaninë e Madhe. Pala mbrojtëse tha se klienti i tyre ishte autik dhe vuante nga krizat, ankthi dhe shtrëngimi.

Pas arrestimit, Sandford u tha oficerëve se kishte planifikuar të qëllonte kandidatin republikan, një manjat pasurish të paluajtshme. Sipas asaj që u dëshmua në gjykatë, ai dështoi t’i rrëmbente armën oficerit.

E ëma e tij tha se kishte humbur kontaktet me djalin e saj, që kur ai ishte larguar nga shtëpia për të udhëtuar drejt SHBA-ve në vitin 2015. Në të kaluarën ai nuk kishte shfaqur asnjëherë interes ndaj politikës, ndaj dhe nëna nuk mundet ta shpjegojë arsyen se përse ai donte ta qëllonte Trumpin.

Sipas dokumenteve të gjykatës, Sandford ishte i pastrehë dhe jetonte në mënyrë ilegale në SHBA teksa i kishte skaduar viza, ndërsa shërbimeve sekrete i kishte thënë se kishte udhëtuar nga Kalifornia drejt Nevadës me objektivin për të vrarë Trumpin.

Dokumentet treguan me detaje sesi ai kishte thurur planin për sulmin në fjalë prej rreth një viti, ndërkohë që kishte shkuar në një poligon në Las Vegas ditën përpara aktit për të mësuar sesi të qëllonte, duke shtënë plot 9 herë me një pistoletë “Glock” të kalibrit 9 mm.

Ai i kishte rrëfyer një oficeri se priste që të vdiste pas sulmit, por nga ana tjetër, ai kishte edhe bileta për një tjetër miting të Trumpit në Arizona, nëse do t’i nevojitej një mundësi e dytë. /tch/