Balija: Bashkëpunimi rajonal kyç për zhvillim socio-ekonomik

Drejtori Ekzekutiv i Këshillit të Investitorëve Evropian, Shpend Balija, po merr pjesë në punimet e takimit të Këshillit të Bashkëpunimit Regjional (RCC) në Beograd.

Gjatë këtij takimi, udhëheqësi i KIE, Shpend Balija, ka theksuar se “në Kosovë, KIE në bashkëpunim me Ministritë e linjës janë të përkushtuar në përmirësimin e ambientit të biznesit, kështu duke mundësuar harmonizimin e ligjeve dhe heqjen e barrierave për investitorët e huaj. Ky kontribut është një vlerë e shtuar për Kosovën, por edhe për rajonin, duke pasur parasysh se konvergjenca ekonomike e rajonit në tërësi kundrejt vendeve të BE-së është jashtëzakonisht e rëndësishme dhe duhet të ndodhë sa më parë në mënyrë që edhe standardi i jetesës të ngritët sa më parë për qytetarët. Zhvillimi socio-ekonomik është mënyra më e mirë për të krijuar stabilitet afatgjatë në rajon, por kjo duhet të ndodhë me një dinamikë më të përshpejtuar”, është shprehur Balija.

Takimi i Këshillit (RCC) ndër të tjera, ka për qëllim diskutimin se si të përmirësohen politikat rajonale dhe ato kombëtare të secilit shtet për të themeluar bashkëpunim të mirëfilltë dhe të qëndrueshëm për ta përmirësuar ambientin e të bërit biznes dhe për të tërhequr sa më shumë investime të huaja direkte (IHD).

Republika e Kosovës është anëtare me të drejta të plota e Procesit të Bashkëpunimit të Evropës Juglindore. /Telegrafi/