Vuçiq: Dialogu me Kosovën do të jetë i vështirë, por duhet të vazhdojë

Kryeministri i Serbisë, Aleksandër Vuçiq në një konferencë të përbashkët me kryeministrin e Shqipërisë, Edi Rama, i cili është në një vizitë në Serbi ndër të tjera ka folur për raportet ndërmjet Serbisë dhe Kosovës.

Duke komentuar deklaratat e presidentit serb, Tomislav Nikoliq se marrëdhëniet Kosovë-Serbi janë në nivelin më të ultë, Vuçiq tha se ka shumë argumente për të thënë se për këtë çështje fajtore është Kosova, por megjithatë nuk do ta thotë një gjë të tillë.

Vuçiq tha se procesi i dialogut nuk do të jetë e lehtë në periudhën në vazhdim, por procesi duhet të vazhdojë në të mirë të zhvillimit ekonomik të rajonit.

Kryeministri serb tha se shqiptarët dhe serbët janë dy kombet më të mëdha në rajon dhe për këtë duhet të bashkëpunojnë për të mirën reciproke.

Ai tha se është fat i mirë që procesi i dialogut nuk ndalohet, pasi sipas tij herë pas here duket sikur ky proces do të ketë një fund të keq, por shprehu besimin se kjo nuk do të ndodh.

“Duhet të gjejmë kompromise”, tha Vuçiq. /Telegrafi/