Thaçi emëroi Bedri Islamin këshilltar të jashtëm

Presidenti i vendit, Hashim Thaçi, e ka emëruar ish-drejtuesin e LPK-së dhe veprimtarin e njohur, Bedri Islami, këshilltar të tij të jashtëm.

Telegrafi ka mësuar se presidenti Thaçi, i cili si Kryeministër i Qeverisë së Përkohshme e kishte propozuar Islamin për kryetar të Grupit të Punës për shndërrimin politik të LPK-së dhe krijimin e forcës së re politike, këto ditë atë e ka emëruar këshilltar të jashtëm të tij.

Bedri Islami, i cili njihet për angazhimin e tij në LPK, ka kryer studimet e larta në gjuhë shqipe dhe letërsi në Universitetin e Tiranës dhe më pas ka diplomuar edhe në gazetari, shkruan Telegrafi.

Ai është autor i 14 librave me poezi, publicistikë, romane, drama dhe tregime.

Nga janari i vitit 1994 dhe deri në qershor të vitit 1999, me publicistikën e tij ishte vënë në shërbim të lëvizjes çlirimtare, duke botuar tek “Zëri i Kosovës” dhe tek media të ndryshme në Shqipëri.

Gjithashtu, në fillet e para të luftës së UÇK-së, Islami njihet si organizator i disa prej mitingjeve më të rëndësishme të LPK-së në mbështetje të luftës, si në Mynih, Bon, Këln, Shtutgart, Londër, Gjenevë, Rambuje, etj.

Në maj të vitit 1998, në mënyrë unanime Islami ishte zgjedhur drejtues i LPK-së.

Ndërsa, në qershor të vitit 1999, në Prizren ai kishte drejtuar mbledhjen e përgjithshme të Lëvizjes Popullore të Kosovës, ku në emër të Këshillit të Përgjithshëm kishte bërë propozimin për kalimin e LPK-së në një organizatë politike legale.

Për luftën çlirimtare në Kosovë, Bedri Islami ka botuar edhe 6 libra me publicistikë.

Pas vitit 1999, me miratimin e bashkëveprimtarëve të tij, ai ishte tërhequr nga jeta aktive politike, duke u kthyer tash sërish, por si këshilltar i jashtëm i presidentit Thaçi. /Telegrafi/