Sa bileta janë shitur për koncertin e Dua Lipës?

Organizatorët e koncertit të Dua Lipës në Prishtinë kanë njoftuar se vetëm në ditët e para janë shitur afro 40 për qind e biletave.

Sipas organizatorëve, kjo shifër e biletave të shitura nuk ishte pritur as nga vetë ata.

Dua Lipa do të mbajë koncertin e parë në trojet shqiptare më 9 gusht në Parkun e Gërmisë dhe organizatorët kanë bërë të ditur se në të nuk do të lejohet askush më i ri se 16-vjeç, përveçse nëse shkojnë nën përcjelljen e një personi në moshë madhore.

Lexo po ashtu Dua Lipa sjell pamje të nxehtë në vaskë (Video, +18)

“Të gjithë ata që duan të jenë pjesë e koncertit dhe janë nën moshën 16 vjeç, obligohen të kenë përcjellje të prindërve ose një personi në moshë madhore”, thuhet në njoftim.

Organizatorët po ashtu deklarohen se siguria do të jetë në nivelin më të lartë, duke falënderuar edhe Policinë e Kosovës për ndihmën e dhënë në ruajtjen e sigurisë në hapësirat e Parkut të Gërmisë.

“Pjesëmarrësve nuk do t’u lejohet që me vete të kenë pije/ushqim apo çfarëdo objekti i cili do të mund të përbënte rrezik për sigurinë e pjesëmarrësve, ndërsa me kërkesë të policisë së Kosovës veturat nuk do të kenë qasje atë ditë në parkun e Gërmisë”, thuhet më tej në njoftim.

Koncerti do të mbahet prej orës 19:00, ndërsa vetë Dua ditë më parë u shpreh e lumtur që do të performojë në vendlindje. Një ditë më pas ajo do të performojë edhe në Tiranë.