Banorët e Lloshkobares i frikohen përsëritjes së tragjedisë së Kolovicës (Video)

Para disa vjetësh, deponia në fshatin Lloshkobare, në zonën e njohur si “Llojza”, ishte mbyllur, por një pjesë e saj ka vazhduar të jetë funksionale. Në të, pos që janë mbledhur mbeturina, është krijuar edhe një pusetë e madhe nga gërmimi i dheut, e cila ka ngjallur frikë te banorët. Thonë se kanë frikë për fëmijët dhe se asnjëherë ata nuk i lejojnë të lëvizin lirshëm, raporton KTV.

Përfaqësuesit e kompanisë, pa dashur të flasin para kamerës, kanë thënë se kanë licencë nga Komisioni për Miniera dhe Minerale dhe se, sipas tyre, nuk paraqesin kurrfarë rreziku për banorë.

Qamil Hasanaj ka thënë se tani janë duke e mbyllur gropën, pasi leja e tyre e punës përfundon në janar të vitit të ardhshëm.

Hasanaj ka thënë se ata janë pronarë të parcelës dhe se po i lejojnë banorët të hedhin mbeturina falas aty.

Megjithatë, shoqëria civile thotë se institucionet do të duhej të ofronin siguri për banorët dhe të parandalojnë ndonjë tragjedi të mundshme.

Por, Komuna nuk ka marrë asnjë përgjegjësi mbi vete, përcjell koha.net. Zyrtarët e saj kanë konfirmuar se prona është private dhe se, sipas tyre, në këtë rast janë të pafuqishëm ndaj çfarëdo veprimi.

https://vimeo.com/174115744