Çka thoshte ministrja Bajrami nëse dështon Brezovica (Video)

Sot zyrtarisht ka dështuar projekti i Brezovicës, projekt shumë i rëndësishëm për ekonominë e vendit, pasi Konzorciumi i kompanive “MDP Consulting – Compagnie des Alpes”, ka dështuar t’i sigurojë 163 milion euro për fazën e parë të investimeve në kompleksin turistik “Brezovica”.

Ministrja e Ministrisë së Tregtisë dhe Industrisë në fillim të muajit kishte thënë se nuk është e sigurt se çka do të ndodhte me projektin. Por, ajo jepte edhe zgjidhjen se çka nëse dështonte konzorciumi francez të siguronte 163 milionë euro, transmeton Koha.net.

Bajrami thoshte se janë në kontakte me investitorë tjerë nëse projekti dështon, duke u mbështetur tek lehtësirat që do t’i sjellë ligji i ri për investime Strategjike.

“Nëse ndodhë një gjë e tillë, ne kemi Ligjin për Investime Strategjjike, që shumë shpejt do të kalojë në Kuvend… Me këtë ligj, unë e kam thënë edhe më herët, e mira që i është bërë Brezovicës është se i është bërë një marketing nga ana e konzorciumit, ata kanë mobilizuar të gjithë potencialin për të gjetur financues për projektin dhe i ka dhënë projektit një renome. Sot e asaj dite jemi në kontakt me dhjetëra kompani që janë të njohura në resorte të skijimit, që kanë shprehur interesin në forma të ndryshme për projektin, por nuk kanë arritur marrëveshjet me konzorciumin”, ka thënë Bajrami në “Interaktiv” të KTV-së, më 1 qershor 2016.