Orav: Partitë politike të dëshmojnë se ‘Përzhino’ është gjallë

Pas tërheqjes së vendimit për falje nga Presidenti Gjorge Ivanov, sot në mëngjes Aivo Orav ka dhënë deklaratë për televizionin ‘Nova’, transmeton Telegrafi Maqedoni.

‘Pasi Presidenti tha se vendimi për falje të politikanëve do të tërhiqet, të gjitha ngjarjet që lidhen me faljen dhe anulimin e tij ishin pa precedent. Këto falje dhe më tej thelluan krizën dhe për fat të keq ka pasur vonesa në zbatimin e marrëveshjes së Përzhinos, por edhe vonesa në hetimin e PSP-së. Do të doja të ju kujtoj se koha për hetimin e PSP-së ka zgjatur 18 muaj. Unë shpresoj se do të zbatohet drejtësia, se më nuk do të flasim për moskërcënim dhe se PSP do të punojë pa ndërprerje dhe pa ndërhyrje nga ana e partive politike. Kohët e fundit shumë është folur për Marrëveshjen e Përzhinos, dhe se a është ende në funksion dhe mendoj se të gjitha partitë politike duhet të dëshmojnë se Përzhino ende është gjallë. Kjo do të thotë se partitë politike duhet të bien dakord për detajet sesi dhe kur do të mbahen zgjedhjet, si dhe për atë se cilët reforma duhet të zbatohen për mbajtjen e tyre. Në javët e fundit unë me bashkëpunëtorin tim amerikan, Jess Baily, ishim në kontakt të ngushtë me të gjitha partitë politike dhe jemi të gatshëm për kontakt më të ngushtë për të ndihmuar palët në zbatimin e Marrëveshjes Përzhino për Maqedoninë që të mund tërësisht të dalë nga kriza politike’, tha Orav.