“LDK-ja nuk mund ta akuzojë Vetëvendosjen për keqpërdorime në Prishtinë”

(E plotësuar)- Shqetësimi kryesor i opozitës sipas shefit të asamblistëve te LVV-së është mënyra e qeverisjes së tyre e veçanërisht kryetarit Shpend Ahmetit. Kështu ka thënë ai në Rubikon të KTV-së.

“Shpendi është një kryetar që mund të udhëtoj me autobus dhe kjo po i shqetëson ata”, ka thënë ai. Në anën tjetër, qeverisja e Ahmetit shihet si dështim nga partitë opozitare në Komunën e Prishtinës.

Flamur Shala nga LDK-ja i është referuar çështjes së buxhetit, të cilin e ka cilësuar si të dështuar.

“Buxhet më të dështuar nuk ka pasur në vitet e fundit”, ka thënë ai duke shtuar se për këtë as nuk ka raportuar më në Kuvend.

Nëse udhëton me autobus apo jo kryetari Ahmeti nuk është problem i qytetarit sipas asamblistit të AKR-së, Sami Borovci. Ai ka thënë se as LDK-ja nuk ka hapësirë për të akuzuar qeverisjen e VV-së pasi gjendja kaotike e Prishtinës është si pasojë e keqqeverisjes së kësaj partie për shumë vite.

Çantat e rënda të fëmijëve mbeten ende premtim i paralizuar i kryetarit Ahmeti. Projekti për kontrollimin shëndetësor të fëmijëve është kritikuar nga Flamur Shala j cili ka thënë se i është kushtuar rëndësi e madhe ushqimit dhe kontrollit të shëndetësor të fëmijëve.

Qëndron Kastrati e Flamur Shala kanë vazhduar të shkëmbejnë ofendime e kritika ndaj subjektit të njeri tjetrit madje edhe në nivelin qendror.

“E keni një kryeministër ku gjininë femërore e nxjerrin zvarrë”, i është drejtuar Kastrati – Shalës. Në anën tjetër, Bujar Cakolli nga PDK ka thënë se edhe pse ka pasur iniciativa që të ketë bashkëpunim ne mes të VV-së e PDK-së në nivel lokal, ai thotë se është i gëzuar që një gjë e tillë nuk ka ndodhur.

Shala akuzon Ahmetin për neglizhencë të procedurave për rastin e autobusëve

Presioni i opinionit publik ka bërë që të nënshkruhet kredia për projektin e autobusëve. Kështu është shprehur Qëndron Kastrati nga LVV në “Rubikon” të KTV-së. Mirëpo kjo nuk u mirëprit nga asamblistët e ftuar të PDK-së, LDK-së dhe AKR-së.

Flamur Shala nga LDK-ja ka thënë që propozimi që bëri partia e tij, bëri që të merret parasysh edhe vendimi.

“Më ka habitur kryetari Ahmeti i cili ka punuar tri vite në BERZH dhe po neglizhon procedurat”, ka thënë ai duke shtuar se në këtë nuk i ndihmon as nënkryetari Dardan Sejdiu.

Trafiku urban nuk është problemi kryesor i qytetarëve të Prishtinës, ka thënë Bujar Cakolli nga PDK-ja. Ai ka shtuar se Prishtina ka shumë probleme tjera mirëpo zhurma për “Trafikun Urban” po bëhet qëllimshëm për të zhvendosur vëmendjen e qytetarëve nga problemet tjera.

“Kryetari Shpend Ahmeti natën e rrënon kryeqytetin dhe ditën e ndërton me paratë e taksapaguesve”, ka thënë ai.