“Neuer Zürcher Zeitung”: Thaçi, garantues i stabilitetit në rajon

Gazeta prestigjioze zvicerane “Neuer Zürcher Zeitung” (NZZ) ka shkruar për procesin e liberalizmit të vizave për Kosovën.

Sipas gazetës, vendimi për heqjen e vizave për qytetarët e Kosovës vjen pas një dialogu disa vjeçar ndërmjet Kosovës dhe Bashkimit Evropian. Ndërkohë, Kosova mbetet t’i plotësojë disa kritere të tjera, për çfarë gazeta ngre dyshime.

Gazeta zvicerane citon analistë, të cilët vlerësojnë se vendimi i Komisionit Evropian si në të shumtën e rasteve të shteteve të Ballkanit është vendim politik.

Sipas tyre, vendimi pozitiv për Turqinë dhe një vendim negativ për Kosovën, vështirë se do të mund të arsyetohej nga BE-ja.

“Lajmi nga Brukseli padyshim që forcon shpinën e presidentit të Kosovës, Hashim Thaçit dhe kryeministrit Isa Mustafa. Sidomos Thaçi, në Bashkimin Evropian konsiderohet si garantues i stabilitetit në Rajon”, shkruan NZZ.

Gjithashtu, gazeta zvicerane shkruan se tash i mbetet autoriteteve kosovare që t’u sqarojnë qytetarëve për kufizimet e lëvizjes së lirë, e cila në shumë shtete të Ballkanit është keqkuptuar.