Ferronikeli pret daljen në Ligën e Kampionëve

Klubi i futbollit Ferronikeli ka fituar edhe një titull kampioni, të dytin rresht. Por, titulli i fituar të dielën në Gjilan, tri xhiro pa përfunduar edicioni 2015-2016, është vlerësuar i veçantë nga trajneri, lojtarët dhe anëtarët e Kryesisë.

Skuadra nga Drenasi është kampionia e parë e Kosovës pas pranimit të UEFA, shkruan sot Koha Ditore.

Me këtë sukses skuadra nga Drenasi pritet të marrë pjesë edhe në fazën paraeliminatore të Ligës së Kampionëve për stinorin që vjen. Bashkë me këtë, edhe 250 mijë euro nga fondi i UEFA-s për shpërblime.

Sipas Federatës së Futbollit të Kosovës (FFK), tri ekipe kosovare do të shpërblehen nga UEFA, kampioni me 250 mijë euro, nënkampioni me 200 mijë dhe fituesi i Kupës me 200 mijë të tjera. Po kaq ekipe pritet të dalin në garat evropiane, por për këtë saktë do të vendoset në fund të këtij muaji, ka njoftuar UEFA.

Ferronikeli mbrojti titullin e kampionit fal fitores së arritur të dielën ndaj Gjilanit 1:0 dhe humbjes së përcjellëses së parë Hajvalisë ndaj Besës (3:2). Ferronikeli zë vendin e parë me 62 pikë, kurse Hajvalia të dytin me 52 pikë kur kanë mbetur edhe tri xhiro. Në pozitën e tretë është Trepça ’89 me 49 pikë..