Hoti: Buxheti në tri vitet e ardhshme rritet për 21%

Qeveria e Kosovës në mbledhjen e mbajtur ka miratuar raportin tremujor të buxhetit për vitin 2016. Ministri i Financave, Avdullah Hoti tha se performansa e të hyrave, është në rritje dhe se në këtë tre mujor të këtij viti, të hyrat janë rritur për 20 për qind.

Ai pohoi se Qeveria po vazhdon politiken e kursimeve dhe menaxhimit të mirë financiar.

“Performansa e të hyrave është në rritje. Në këtë tre mujor, kemi pasur një rritje rreth 20 për qind më të madhe se sa tre mujorin e vitit të kaluar. Pra, nëse e krahasojmë jo vetëm me qeveritë paraprake, por edhe me vetëm me vitin 2015, prej të cilave kemi një rritje prej 26 për qind në Dogana dhe një rritje prej 3 deri në 4 për qind në Administratën Tatimore. Kemi pasur një menaxhim shumë më të mirë financiar, duke u kujdesur që të shpenzojmë vetëm në çështjet që janë më të rëndësishme. Duke e vazhduar politiken e kursimeve në mallra dhe shërbime dhe në shpenzime tjera. Rritja e shpenzimeve gjatë këtij tre mujori ka qenë 17 për qind, që vjen kryesisht si rezultat i rritjes së asistencës sociale që ka ndodhur në nëntor të vitit të kaluar. I rritjes së pensioneve për pensionistet kontribut dhënës që ka filluar nga janari i këtij viti”, tha ai.

Qeveria po ashtu ka miratuar edhe kornizën afatmesme të shpenzimeve, për vitet 2017-2019, e cila parasheh që buxheti për tri vitet e ardhshme të rritet për 21 për qind. Ministri Hoti tha se ndryshimet substanciale në këtë kornizë janë klauzola e investimeve në bazë të marrëveshjes me FMN-në.

“Buxheti për tri vitet e ardhshme është paraparë të rritet me rreth 21 për qind, krahasuar me atë që kemi tash. Ndryshimet substanciale në këtë kornizë janë klauzola e investimeve. Pra, në bazë të marrëveshjes që kemi me FMN-së dhe ndryshimin e ligjit të financave publike që e kemi bërë në fund të vitit të kaluar. E cila klauzolë ne ve na mundëson që të hyjmë në kredi tek institucionet financiare ndërkombëtare, për të financuar projektet kapitale që kanë kostashumë të madhe. Një ndryshim tjetër dhe e re në këtë kornizë, është buxheti që tanimë është parashikuar për fillimin e implementimit të sigurimeve shëndetësore nga janari i vitit 2017. Buxheti është parashikuar dhe është shpërnda nëpër ministritë përkatëse, për të mbuluar koston e sigurimeve shëndetësore në bazë të përgatitjeve që është duke bërë ministria e shëndetësisë”, tha ai.

Ndryshe, Qeveria ka miratuar dhe Projektligjin për regjistrimin e popullsisë, ekonomive familjare dhe banesave në komunat e Kosovës, që nuk kanë marrë pjesë në regjistrimin e vitit 2011.

Projektligjin për ratifikimin e marrëveshjeve për hua ndërmjet Kosovës dhe Bankës Evropiane për Rindërtim dhe Zhvillim, për rehabilitim të rrugëve rajonale dhe për projektligjin për ratifikimin e marrëveshjes financiare ndërmjet,Qeverisë së Kosovës dhe Bankës Evropiane për investime për projektin e rehabilitimit të Linjës hekurudhore. /Telegrafi/