Besojeni ose jo, ky kapak i stilolapsit ka shpëtuar jetën e miliona fëmijëve!

Të gjithë e njohim këtë lloj të stilolapsit, mirëpo shumë pak e dinë se pse forma e kapakut të tyre është e tillë.

Në vitin 1991, kompania BIC  kishte prezantuar një dizajn të ri, ku në kapakun e stilolapsave kishte një vrimë të vogël, transmeton Telegrafi.

Shumë pak njerëz e kishin vërejtur dhe kuptuar rëndësinë e kësaj shpikje. Sidoqoftë, vendimi për këtë dizajn kishte shpëtuar jetët e miliona fëmijëve, e gjithashtu edhe një numër të madh të njerëzve të rritur.

Fëmijët e vegjël kanë dëshirë t’i shijojnë të gjitha objektet që iu bien në dorë, veçanërisht objektet e vogla që mund t’i fusin në gojë. Në anën tjetër, të rriturit kanë dëshirë të kafshojnë kapakun e stilolapsit gjatë kohës që janë nervozë apo të përqendruar.

Kapaku i stilolapsit shumë lehtë mund të futet në kanalin e frymëmarrjes, duke shkaktuar që personi të mbetet pa frymë dhe të vdesë. Në situata të këtilla, vrima e vogël në kapak të stilolapsit ndihmon që një person të marrë mjaftueshëm oksigjen derisa ambulanca të arrijë.

Vendimi i BIC për këtë dizajn ishte mbështetur nga një numër i madh i prodhuesve të stilolapsave. /Telegrafi/