Muhaxheri synon ngritjen e qendrës së skijimit Borea, më të madhe në rajon

Gazmend Muhaxheri, kryetar i Pejës, mbrëmë në emisionin ‘’Ekonomia me Erëzën’’, ka shpalosur detajet e projektit komunal për ndërtimin e një qendre të madhe të skijimit në malet mbi Pejë.

Muhaxheri ka pohuar se qendra e skijimit, e emërtuar Borea, planifikohet të ndërtohet nëpërmjet partneritetit publiko-privat.

“Kemi kryer fizibilitetin për këtë qendër dhe master planin. Jemi në finalizim të proceduarve ligjore që në muajin e ardhshëm ta qesim në partneritet publiko-privat ndërtimin e kësaj qendre. Do të ketë impakt edhe në zhvillimin e bujqësisë dhe të ndërmarrjeve të vogla’’, ka deklaruar Muhaxheri.

Ai ka shtuar se pritet të organizohet edhe një konferencë investitorësh, që mund të jenë të interesuar për të investuar në ndërtimin e kësaj qendre.

“Ka kompani zvicerane, turke, italiane, britaneze. Besoj qe do të mbajmë një konferencë në komunën e Pejës me investitorë të mundshëm vendas. Ndoshta do të duhet të mbajmë edhe një konferencë diku jashtë për të nxitur më shumë investitorë të jashtëm për ta ndërtuar këtë qendër’’, ka sqaruar ai.

Po ashtu, Muhaxheri ka thënë se faza e parë e ndërtimit të saj pritet të kushtojë rreth 27 milionë euro.

“Parametrat janë të mira për ndërtimin e kësaj qendre. Ka lartësinë mbidetare prej 2480 metrash. Është qendra më e madhe në regjion. Planifikimet e mëhershme janë bërë në kohën e ish-Jugosllavisë. Ka qenë e planifikuar të jetë qendra më e mirë turistike, mirëpo për shkaqe të ndryshme nuk është ndërtuar”, ka pohuar Muhaxheri.

Kryetari i Pejës ka pohuar mbrëmë se ndërtimi i fazës së parë përfshinë ndërtimin e kabinave të teleferikut deri në lartësi 1 mijë e 600 metrash.

“Ndërsa prej lartësisë 1600 metra deri në lartësinë prej 2480 metra shkohet me skilifta, nga 6 persona. Në fazën e dytë do të ndërtohen edhe dy skilifta. Pra gjithsejtë për dy vjet do të jenë tre skilifta, të cilët u shërbejnë qytetarëve që shkojnë për t’u marrë me skijim”, ka thënë Muhaxheri, duke shtuar se në këtë qendër parashihet të skijojnë rreth 14 mijë veta brenda ditës.

Sipas tij, ky investim do të ndikojë në zhvillimin e ekonomisë lokale të Pejës.

“1 euro e fituar në teleferik në ekonominë lokale do të jetë 10 euro. Do të thotë impakti i fitimit në teleferik do të jetë 1 me 10”, ka pohuar Muhaxheri. /Telegrafi/