Sport Futboll Ndërkombëtare

“Hat-tricku” i Carrollit ndër më të shpejtët në Ligën Premier (Video)

Para 9 vitesh

Andy Carroll ka shënuar “hat-trickun” e pestë më të shpejtë në histori të Premier Leagues ndërsa kishte ndihmuar skuadrën e tij, West Ham, të shtunën të nxirrte një barazim 3:3 në shtëpi ndaj Arsenalit.

Ai shënoi tre gola në një hark kohor prej shtatë minutave. Në të vërtetë, dy golat e parë i shënoi në fund të pjesës së parë, ndërsa të tretin në minutat e parë të pjesës së dytë, shkruan Daily Mail.

West Hami nga disavantazhi 2:0 kishte shkuar në pauzë mes pjesëlojëve me rezultat baras 2:2, ndërsa mori më pas epërsinë 3:2 fal Carrollit, epërsi të cilën nuk arriti ta mbante deri në fund, përcjell Koha Ditore.

“Ne kemi stërvitur gjithë javën se si të sulmojmë kundërshtarin me krosime. E kemi ditur se kjo është pika e dobët e kundërshtarit. Stërvitjet na u shpaguan”, ka thënë Carroll.

Ndonëse “hat-tricku” i Carrollit ishte mbresëlënës ai nuk është më i shpejti i shënuar ndonjëherë në elitën angleze. Më poshtë i paraqesim katër tregolëshat më të shpejtë të shënuar në elitën angleze.

Sadio Mane kundër Aston Villas – 2015 (dy minuta e 56 sekonda)

Sulmuesi i Southamptonit, Sadio Mane, kishte shënuar një tregolësh mbresëlënës kundër Aston Villas vitin e kaluar, duke thyer rekordin për më tepër se dy minuta. Mane – që është transferuar nga Salzburgu në verën e vitit 2014 – kishte shënuar para asaj ndeshjeje vetëm shtatë gola në 30 ndeshje. Por ai shpërtheu në fitoren 6:0 të skuadrës së tij ndaj Aston Villas.

Ai shënoi tre golat e tij për dy minuta e 56 sekonda që është rekord në Premier League si “hat-tricku” më i shpejt.

Robbie Fowler kundër Arsenalit – 1994 (katër minuta e 33 sekonda)

Një rekord që qëndroi për më tepër se 20 vjet. Sulmuesi Robbie Fowler u fut në folklorin e tifozëve të Liverpoolit dhe mori madje edhe nofkën “zoti” për golat e tij, veçanërisht tre golat e shënuar në ndeshjen kundër Arsenalit në vitin 1994.

“Hat-tricku” i tij i shënuar ndaj Arsenalit për katër minuta e 33 sekonda është edhe më impresionues duke marrë parasysh repartin e fortë defensiv që kishte Arsenali. Mbrojtja e Arsenalit përbëhej nga emrat si Lee Dixon, Martin Keown, Toni Adams e Nigel Winterburn, ndërsa në portë ishte David Seaman.

Një gabim i Keownit kishte lejuar Ian Rushin që të pasonte topin te Fowleri 19-vjeçar që shënoi me një gjuajtje të ultë. Ai shpërtheu edhe me dy gola tjerë duke dëshmuar aftësitë e mëdha të sulmuesit që i kishte.

Jermain Defoe kundër Wiganit – 2009 (shtatë minuta)

Në total Jermain Defoe kishte shënuar pesë gola në fitoren e thellë 9:1 të Tottenhamit ndaj Wigan Athleticut.

Një krosim i Aaron Lennonit kishte mundësuar Defoen që të shënonte golin e parë.
Një mbrojtje katastrofale e Wiganit, e lejoi atë të shënonte shpejt golin e dytë, ndërsa goli i tretë ishte sërish gol i shënuar fal krosimit të Lennonit.

Gabriel Agbonlahor kundër Manchester Cityt – 2008 (shtatë minuta)

Tifozët e Aston Villas do të kishin dhënë çdo gjë sot për të parë një rezultat të tillë. Para se Aston Villa të ishte në fund të renditjes në Premier League, ekipi i drejtuar atëbotë nga Martin O’Neil ishte i ri dhe vlerësohej mjaft atraktiv.

Po bënte përparim të madh dhe po luante lojë të mirë. Lojtari i dal nga akademia Gabriel Agbonlahor kishte shpërthyer në vitin 2008 në ndeshje kundër Manchester Cityt, duke shënuar “hat-trick” për shtatë minuta në fitoren 4:2 të skuadrës së tij.

Ai shënoi golin e parë pas një pasimi të John Carewit, ndërsa të dytin e realizoi me kokë pas një krosimi të Gareth Barryt. Barry kishte shërbyer Agbonlahorin edhe në golin e tretë. Agbonlahor pasi mori topin nga Barry dribloi Micah Richardsin dhe shënoi me një gjuajtje të fortë me të majtën duke kompletuar një ndeshje perfekte të tij.