Mësimdhënësve të viteve të 90-ta nga sot fillon t’u njihet kontributi

Të gjithë mësimdhënësit kontributdhënës gjatë viteve 1990-99 në vendin tonë nga sot mund ta aplikojnë në Drejtoritë Komunale të Arsimit për njohjen e përvojës së punës për vitet e punës në periudhën 1990-1999, pagesat e të cilave do të bëhen nga 1 janari 2017 në mënyrë retroaktive.

Një vërtetim i tillë është bërë publik sot nga ministri i Arsimit, Arsim Bajrami, i Punës dhe Mirëqenies Sociale, Arban Abrashi si dhe kryetari i Sindikatës së Arsimit, Rrahman Jasharaj.

Ministri Bajrami tha se sot po fillon njohja e kontributit të këtyre mësimdhënësve të cilat kanë kontribuar në shtetndërtimin e Kosovës.

“Sot edhe zyrtarisht po e shënojmë fillimin e implementimit të vendimit të MASHT-it dhe MPMS-së në bashkëpunim me SBASHK-un me të cilën ne jemi zotuar se do të njohim përvojën e punës së mësimdhënësve të viteve nëntëdhjeta për skemat pensionale. Është ky vërtetimi zyrtar që nga sot të gjithë mësimdhënësit do ta plotësojnë në DKA-të pastaj MASHT menjëherë do ta procedojë duke e vendosur në skemat e pensioneve. Është ky një hap shumë i domosdoshëm, një hap shumë i mirëpritur që mësimdhënësve që kanë punuar dhe kanë rezistuar në kohën më të vështirë, në kohën e mbijetesës së sistemit arsimor, t’u njihet përvoja e punës dhe ata të marrin pension të dinjitetshëm dhe të merituar. Pa dyshim që është edhe një dëshmi që qeveria është e përkushtuar që të jap mirënjohje për punën e të gjithë mësimdhënësve në sistemin arsimor. Siç e dini ne e kemi përgatitur edhe ligjin për mësimdhënësit e viteve të ’90 dhe si qeveri jemi duke punuar që të gjejmë konstruksione që ky ligj të implementohet”, tha Bajrami.

Ministri i Punës Arban Abrashi tha se pagesa e mësimdhënësve do të bëhet varësisht nga vitet e shërbimit.

“Me këtë e njohim përvojën e punës së secilit punëtor të arsimit gjatë viteve ’90, në këtë kuadër mund të ndodh që dikush ka punuar 8 vite, dikush 2 vite, dikush 3 vite, pra do të kalkulohet përvoja e punës e secilit në përvojën totale, nëse arrihen 15 vite atëherë ai mësimdhënës, kalon në pension kontributdhënës dhe varësisht nga kualifikimi, sapo kalon në kontributdhënës e ka bazën 158 euro dhe pastaj varësisht nga kualifikimi shkollor që mund të ketë vazhdon përshkallëzimi. Ne përshkallëzimin ose kategorizimin e sjellim me vendim të qeverisë javën e ardhshme pasi që edhe procesi i aplikimit ka mbaruar më 3, por ne kemi konsideratë për ta dhe procesi për ta nuk mbyllet pra është një trajtim i veçantë të cilin ne e kemi bërë. Sa i përket kategorizimit e kemi përmend edhe më herët, buxhetin e kemi të siguruar. 158 euro di të jetë baza dhe varësisht nga kualifikimi mund të rritet deri në 240 euro por me vendimin e Qeverisë javën e ardhshme do ta marrim atë vend im në mënyrë që pagesa të bëhet në mënyrë retroaktive nga 1 janari”, ka deklaruar Abrashi.

Vërtetimin e publikuar e ka vlerësuar lart edhe Sindikata e Bashkuar e Arsimit.

Kryetari i kësaj sindikate, Rrahman Jasharaj, tha se dita e sotme është një arritje e madhe e të gjithëve. “Nga sot të gjithë mësimdhënësit e Kosovës që pensionohen do të jenë të barabartë me kolegët e tyre dhe do ta gëzojnë pensionin e plotë të punës edhe do të kenë mundësi të aplikojnë për përshkallëzimin e pensioneve”, ka deklaruar ai.

Pagesat për kontribut në mësimdhënie gjatë viteve 1990-1999 të gjithë mësimdhënësit do t’i marrin nga dita e pensionimit në vend të pensionit të pleqërisë të cilin e kanë marrë deri më tani. /Telegrafi/