Kosova natyralizon një amerikan

Federata e Basketbollit e Kosovës (FBK) është duke u munduar ta ndërtojë një skuadër kompakte të Përfaqësueses së Kosovës, në prag të kualifikimeve historike për Kampionatin Evropian, i cili do të mbahet në vitin 2017.

Krahas lojtarëve vendorë, shtëpia e basketbollit kosovar e ka në plan ta natyralizojë një basketbollist të huaj. “Zëri” mëson se FBK-ja i ka hedhur sytë kah liga NCAA, e dyta më e fortë në SHBA, pas NBA-së. Këtë e konfirmon edhe vetë sekretari Leart Hoxha.

“Kemi disa opsione dhe nuk jemi përcaktuar ende. Jemi të fokusuar posaçërisht te pozita qendër, por nuk përjashtohet mundësia ta natyralizojmë një fundor. Jemi në negociata, dhe është e vërtetë se njëri prej tyre luan në NCAA. Është i nivelit të Euroligës, por s’po ngutemi”, theksoi Hoxha.

FBK po e kërkon një basketbollist të ri, rreth 21-22 apo 23 vjeç, në të cilin do të mund të llogarisë në 10 vjetët e ardhshëm. Hoxha tregoi se në një të ardhme të afërt do të kompletohet ekipi përfaqësues, i cili do të luajë në kualifikime në shtator.