Djali i ministrit Bajrami e bën për “pesë pare” anëtarin e Këshillit Drejtues të UP-së

Pas dështimit të zgjedhjes së rektorit të Universitetit të Prishtinës, në rrjetin social Facebook kanë filluar debatet e ashpëra në mes grupeve të ndryshme që, në një formë apo tjetër, kanë interesa të ndryshme brenda Universitetit.

Kështu, anëtari i Këshillit Drejtues, Zeqir Veselaj, ka akuzuar ministrin e Arsimit, Arsim Bajrami, për dështimin e zgjedhjes së rektorit.

“Mungesa e anëtarit ndërkombëtar, dje e pamundësoi që të kemi Rektorin e ri. Votimi i djeshëm tregoi për një situatë që do zgjidhje të shpejtë. Ministri i MASHT-it, duhet të vendos se a mund të mbaj peng Këshillin Drejtues me një anëtar ndërkombëtar që pavarësisht emrit të madh dhe ndihmës së madhe për Kosovën, asnjëherë nuk ka marrë pjesë në mbledhjet e KD-së. Ka shumë sinjale që për shkak të angazhimeve të mëdha të tij e ka të pamundur të vij nga Austria” ka shkruar Veselaj, përcjell ORAinfo.

Por, duket që me këtë konstatim të tij nuk pajtohet djali i ministrit Bajrami, Kushtrim Bajrami.

Ky i fundit ka bërë akuza të rënda në drejtim të anëtarëve të Këshillit Drejtues.

“Këshilli drejtues i Universitetit është peng i interesave të anëtarëve të saj. Është naive të mendohet që disa anëtarë të Këshillit drejtues do ta zgjedhin një rektor me punë të mirëfilltë akademike e shkencore, përderisa janë të paktën tre anëtarë të këtij këshillit që kanë bërë shkelje të rënda të etikës akademike përgjatë karrierës së tyre. Njërit, rektori i Universitetit i kishte marr thirrjen akademike dhe e kishte degraduar për shkak të plagjiaturës. Tjetrit i ishte konstatuar nga profesorët e tij që ishin anëtar të komisioni profesional të FSHMN-së që ka një doktoratë që nuk ka ndonjë vlerë akademike dhe nuk i plotëson kriteret për titullin e doktorit të shkencës. E një anëtar tjetër i Këshillit Drejtues, dikur zëvendësministër i Arsimit, ishte avancuar në thirrjen më të lartë akademike falë mashtrimit që kishte bërë për gjoja publikimin e një punimi në një revistë shkencore kroate. Anëtarë të tillë nuk i duhen organit kryesor qeverisës të institucionit kryesor të arsimit të lartë të Republikës sonë. Të tillë nuk lexojnë CV-të e as nuk ju bëjnë përshtypje programet, ata kanë hallin vetëm te vetja. Ata nuk mund ta votojnë një rektor që ka punë të mirëfilltë akademike dhe shkencore, sepse vota e tyre për një rektor të tillë do të ishte votë për degradimin e tyre, në mos largimin e tërësishëm të tyre nga Universiteti.”

Ja reagimi i plotë i Kushtrim Bajramit:

“Zotni Veselaj,

Këshilli drejtues nuk është peng i një anëtari ndërkombëtar. Këshilli drejtues dje kishte para vetës, siç thoni, intelektual të shquar e me CV brilante. Kishte rastin të dëgjonte edhe programin e tyre. Kishte të gjitha informatat e duhura për të zgjedhur një rektor të Universitetit. Përkundër që ishin 8 nuk arritën të pajtohen për 1. Tash, gishtin për këtë dështim nuk mund ta drejtojnë te i 9-ti që nuk ishte fare aty, e i cili edhe sikur të ishte aty do të mund të abstenonte, e rezultati të mbetej ky që doli mbrëmë.

Këshilli drejtues i Universitetit është peng i interesave të anëtarëve të saj. Është naive të mendohet që disa anëtarë të Këshillit drejtues do ta zgjedhin një rektor me punë të mirëfilltë akademike e shkencore, përderisa janë të paktën tre anëtarë të këtij këshillit që kanë bërë shkelje të rënda të etikës akademike përgjatë karrierës së tyre. Njërit, rektori i Universitetit i kishte marr thirrjen akademike dhe e kishte degraduar për shkak të plagjiaturës. Tjetrit i ishte konstatuar nga profesorët e tij që ishin anëtar të komisioni profesional të FSHMN-së që ka një doktoratë që nuk ka ndonjë vlerë akademike dhe nuk i plotëson kriteret për titullin e doktorit të shkencës. E një anëtar tjetër i Këshillit Drejtues, dikur zëvendësministër i Arsimit, ishte avancuar në thirrjen më të lartë akademike falë mashtrimit që kishte bërë për gjoja publikimin e një punimi në një revistë shkencore kroate. Anëtarë të tillë nuk i duhen organit kryesor qeverisës të institucionit kryesor të arsimit të lartë të Republikës sonë. Të tillë nuk lexojnë CV-të e as nuk ju bëjnë përshtypje programet, ata kanë hallin vetëm te vetja. Ata nuk mund ta votojnë një rektor që ka punë të mirëfilltë akademike dhe shkencore, sepse vota e tyre për një rektor të tillë do të ishte votë për degradimin e tyre, në mos largimin e tërësishëm të tyre nga Universiteti.

Anëtarët e Këshillit Drejtues nuk janë përfaqësues të senatit apo ministrisë. Ata duhet përfaqësojnë veten dhe të veprojnë vetëm sipas bindjes së tyre. Prandaj para se bëni me gisht te tjerët për faktin që ke një koleg ndërkombëtar në Këshillin Drejtues, ndoshta më e udhës do të ishte sikur të interesoheni të kuptoni nëse kolegut tuaj ndërkombëtar i kanë shkuar CV-të e kandidatëve në gjuhën angleze, apo nëse ai ka pasur mundësi t’i lexoj e dëgjoj programet e kandidatëve në gjuhën angleze. Nuk mund të qeveriset universiteti duke mos pasur as aftësitë minimale të organizimit të kushteve të punës për një anëtar ndërkombëtar të Këshillit Drejtues të Universitetit. Një anëtar që shumë universitete të njohura ndërkombëtare do të jepnin e bënin çmos ta kishin në bordet e tyre. Një anëtar që nuk i kushton asnjë cent universitetit, ndërsa është aty për t’i dhënë mundësinë për t’i jap shumë universitetit.

Dështakët e kanë zakon që pas çdo dështimi të drejtojnë gishtin te tjetri. Ata nuk njohin përgjegjësinë e keqardhjen. Përkundrazi, ata besojnë që potencialet e tyre janë aq të mëdha sa të na zgjidhin edhe problemet e shtetit, ashtu siç na i kanë zgjidhur edhe problemet e universitetit. Ata vazhdojnë me i ra radikës!” (sic), ka shkruar Bajrami.