Reperi shqiptar, i nominuar në “Swiss Music Awards”

Rep këngëtari Shkëlzen Kastrati, i njohur si Xen, është i nominuar për festivalin më të madh të ndarjes së çmimeve në Zvicër, “Swiss Music Awards”. Këngëtari shqiptar që jeton në Zvicër është në kategorinë për “Best Breaking Act”. Për të njëjtin çmim garojnë edhe këngëtarët Dado dhe From Kid. Ndarja e çmimeve do të bëhet më 12 shkurt, në Hallenstadion në Cyrih.

Sukseset e Xenit janë të njohura për mediet zvicerane. Albumi i tij “Ich Gäge Mich”, i cili doli në shitje vitin e kaluar, ishte për javë të tëra në maje të shitjeve në faqet zvicerane të shitjes online.

Pikërisht më datën 12 shkurt Xeni do të lansojë edhe një këngë të re, ndërsa albumi më i ri i tij do të lansohet më 29 prill të këtij viti, njofton albinfo.ch.

Xeni së bashku me menaxherin e tij, Dardan Demaj dhe producentin Ilir Avdyli, kanë krijuar edhe një label, ku do të prodhojnë këngë edhe për këngëtarë të tjerë të rinj, të cilët dëshirojnë të jenë pjesë e këtij grupi reperësh muzikorë.

Për të votuar për rep këngëtarin shqiptar Xeni që të fitojë çmimin në kategorinë “Best Breaking Act” në “Swiss Music Awards”, mund ta bëni në këtë faqe: https://swissmusicawards.ch/en/#!/vote