Mumini, gjyqtari që sulmohet më shumë

Xhelal Mumini ndoshta nuk është arbitri më i mirë i basketbollit të Kosovës, por ai është ndër më të sulmuarit nga klubet dhe basketbollistët elitarë.

Mumini së fundi është sulmuar të dielën në Vushtrri, në ndeshjen ndërmjet Trepçës dhe Golden Eagle Yllit, për çka u ndërpre loja dy minuta para se të përfundojë.

Kësaj here Mumini nuk është sulmuar nga zyrtarët e as nga basketbollistët si herëve të shkuara, por nga trajneri i Yllit, Agron Berisha. Gjatë sulmit ndaj Muminit, u futën në parket edhe disa tifozë të Yllit me synim për ta sulmuar atë. Ndeshja ndërmjet Trepçës dhe Yllit ishte derbi i javës së 17-të të Superligës dhe ishte me peshë të madhe për hyrje në plejof. Këto dy skuadra po luftojnë për pozitën e katërt në tabelë, shkruan sot Koha Ditore.

Gjithçka ndodhi në një moment kur banka e Yllit u ndëshkua me gabim teknik. Dhe, derisa njëri prej lojtarëve të Trepçës po bëhej gati për ekzekutim të gjuajtjeve të lira, trajneri Berisha i foli diçka Muminit që ishte pranë tij dhe ky i fundit menjëherë e ndëshkoi me diskualifikim. Këtu, Berisha nisi ta ndjek Muminin për të rrahur. Pas disa metrave ndjekje e zuri atë, por pas intervenimit të basketbollistëve të dyja palëve dhe policisë, Mumini u largua nga duart e trajnerit Berisha.

Trajneri i skuadrës therandase, Berisha është shoqëruar në polici ku ka dhënë deklaratë. Në stacionin e Policisë në Vushtrri janë shoqëruar edhe disa shikues.

Klubi nga Suhareka është distancuar nga ky gjest dhe ka dënuar incidentin.

Në fakt, kjo nuk është hera e parë që Mumini është sulmuar. Mumini më herët është sulmuar edhe nga ish-basketbollisti Valdet Grapci, kryetari i klubit Kosova nga Vushtrria, Sabri Parduzi, dhe nga basketbollisti i Sigal Prishtinës, Dardan Berisha. Ky i fundit e kishte pështyrë sezonin e shkuar pas dhënies së gabimit teknik.