Kikboks, Menxhiqi fiton turneun “Besim Kabashi”

Kikboksieri Dardan Menxhiqi ka fituar turneun ndërkombëtar “Besim Kabashi” të mbajtur të shtunën në Pallatin e Rinisë dhe të Sporteve në Prishtinë.

Konkurrentë nga Kroacia, Mali i Zi, Shqipëria dhe Kosova nderuan ish-kampionin e botës në kikboks, Besim Kabashin, i cili katër vjet me parë ndërroi jetë në Gjermani.

Ky turne i organizuar nga Federata e Kikboksit të Kosovës është përcjellë nga një numër i konsiderueshëm shikuesish të cilët u ndanë të kënaqur më duelet e zhvilluara.

Ish-kampioni i turneut të kaluar, Dardan Menxhiqi sërish arrit të fitojë turneun “Besim Kabashi”, duke qenë dukshëm më i mirë në ring se kroati Silko Iudimir, me të cilin u përball në finale.

Kroacia në këtë turne u prezantua më dy garues, aq sa kishte edhe Mali i Zi. Presidenti i Federatës së Kikboksit të Kosovës, Fatmir Makolli u shpreh i kënaqur me cilësinë e treguar nga garuesit. Ai tha se ky turne në të ardhmen do të jetë edhe më madhështorë dhe me më shumë shtete pjesëmarrëse.

“Para pak momentesh përfundoi turneu ‘Besim Kabashi’, besoj që ka qenë një turne shumë i mirë dhe shumë i frytshëm. Sot kanë qenë pjesëmarrëse katër shtete, Mali i Zi, Kroacia, Shqipëria dhe Kosova. Besoj që ka pas meçe mjaft atraktive. Ky është turneu i tretë më radhë që kemi mbajtur për nderë të Besim Kabashit. Besim Kabashi e ka merituar që gjithmonë ta përkujtojmë me kësi turneu dhe besoj që në të ardhmen do të organizojmë turne pak më madhështor dhe me më shumë shtete pjesëmarrëse”, ka thënë Makolli.

Ai falënderoi Ministrinë e Kulturës, Rinisë dhe Sportit e cila mbështeti organizimin e këtij turneu. Makolli kërkoi që në të ardhmen të ndahen më shumë mjete financiare për shkak se ky turne planifikohet të zgjasë dy deri në tre ditë.

“Vlen të theksoj dhe të falënderoj edhe departamentin e Sportit në kuadër të Ministrisë së Kulturës, Rinisë dhe Sportit e cila na ka përkrahur në organizim të turneut. Besoj që në të ardhmen na nevojiten edhe më shumë financa, që turneu të zgjasë 2-3 ditë”, theksoi ai.

Ndërkaq, kampioni i turneut Dardan Menxhiqi u shpreh i kënaqur me nivelin e organizimit dhe me cilësinë e garuesve, e mbështetjen që ka gjetur nga trajneri, Lutfi Menxhiqi, transmeton kp.

“Turneu ka qenë mjaft i mirë, organizimi po ashtu, njëherësh edhe kundërshtari. Personalisht e kam ditur që do të fitoj. Është hera e dytë që marr pjesë dhe njëherësh edhe që zgjidhem si kikbokseri më i mirë. Besoj që do të vazhdoj edhe në të ardhmen. Meritat më të mëdha i ka trajneri im Lutfi Menxhiqi, i cili ka qëndruar gjatë gjithë kohës me mua”, ka pohuar Menxhiqi.

Ai theksoi se fitorja është një motiv shtesë për të drejt rrugëtimit për të prekur majat e këtij sporti.

“Është një motiv për mua, nuk do të ndalem deri në maje të kikboksit” përfundoi ai.

Kujtojmë se ky është turneu i tretë ndërkombëtar “Besim Kabashi”, turne në të cilin kikboksierët kosovarë sprovojnë forcat me kikboksierët e rajonit. Organizatorët turneut në fund ndanë medalje dhe mirënjohje për gjithë pjesëmarrësit e këtij turneu.