Sistemi Financiar në vend është stabil

Guvernatori Hamza ka pritur në takim Ellen Goldstein drejtoreshë e Bankës Botërore për Ballkanin perëndimor dhe Jan-Peter Olters, drejtor i zyrës së Bankës Botërore për Republikën e Kosovës.

Gjatë këtij takimi Guvernatori i BQK-së Bedri Hamza ka bërë një rezyme në lidhje me zhvillimet e fundit në sektorin financiar në Kosovë, duke nënvizuar qëndrueshmërinë dhe performancën pozitive të sektorit bankar në përgjithësi. Të dhënat e prezentuara dhe treguesit e nxjerrë kanë të bëjnë me periudhën e vitit 2014 dhe janë të dhëna që tregojnë shëndetëshmerinë e sistemit financiar në vend.

Guvernatori Hamza dhe Ellen Goldstei, përveç temave rreth zhvillimeve të fundit ekonomike dhe financiare kanë diskutuar edhe për mbështetjen shumëdimensionale që Banka Botërore vazhdon t’i japë në zhvillimin ekonomik dhe institucional të Republikës së Kosovës.

Po ashtu Guvernatori Hamza e ka njoftuar Ellen Goldstein edhe për statusin dhe rëndësinë e projekteve të financuara nga ana e Bankës Botërore me fokus në segmentet përbrenda projekteve për forcimin sektorit financiar dhe infrastrukturës së tregut.

Ndërkaq Goldstein ka vlerësuar progresin e arritur si dhe përformancën në fushën financiare, ku përveç që ka çmuar bashkëpunimin e lartë të BQK-së me Bankën Botërore ajo i ka konfirmuar Guvernatorit Hamza se Banka Botërore do të vazhdojë mbështetjen e saj për të gjitha fushat të cilat janë me interes për zhvillimin e BQK-së dhe për zhvillimin e sektorit financiar në përgjithësi.

Të dy bashkëbiseduesit u zotuan se BQK-ja dhe Banka Botërore do zgjerojnë edhe më shumë fushat e bashkëpunimit me projekte në të ardhmen, qofshin ato të sferave të asistencës teknike apo të mbështetjeve tjera por duke patur për bazë gjithnjë bashkëpunimin me Zyrën dhe përfaqësuesin Rezident të Bankës Botërore në Kosovë si dhe me përfaqësuesit e Bankës Botërore në Selinë Qëndrore në Uashington. /Telegrafi/